មន្ត្រីក្រសួងពាណិជ្ជកម្មម្នាក់ បានប្រាប់​ឲ្យ​ដឹង​ថា ប្រទេសចិននឹងចាត់វិធានការតបតវិញ ប្រសិនបើសហភាពអឺរ៉ុប (EU) បន្តទៅមុខ​នូវ​ការរឹតបន្តឹង​​ថ្មី លើការនាំចូលរបស់ចិន ខណៈដែលភាពតានតឹងផ្នែក​ពាណិជ្ជកម្ម រវាងភាគី​ទាំង២ នៅតែបន្តកើនឡើង។

នៅឯ​សន្និសីទសារព័ត៌មានប្រចាំ​ថ្ងៃ ក្នុង​ទីក្រុងប៉េកាំង នា​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) នេះ អ្នកនាំពាក្យ លោក He Yadong បាននិយាយថា៖ «ប្រសិនបើអតិរេកពាណិជ្ជកម្ម គឺ​គ្រប់គ្រាន់ ដើម្បីដាក់ស្លាកប្រទេសមួយថា មានការ​ផ្គត់ផ្គង់លើស​តម្រូវការ​​នោះ​ តើ EU មានកម្រិត​ផ្គត់ផ្គង់លើសតម្រូវ​ការ​ លើ​ផ្នែក​រថយន្ត ឱសថ ស្រា និងគ្រឿងសំអាងដែរ ឬទេ?»។

ដោយមិនបានពន្យល់សេចក្ដី​លម្អិត លោកបានបន្ថែមថា ទីក្រុងប៊្រុចសែល​ គួរតែ «ត្រឡប់ទៅរកផ្លូវសន្ទនា​ដ៏ត្រឹមត្រូវវិញ​» ជាមួយទីក្រុងប៉េកាំង ហើយបានសន្យាថា នឹង «ចាត់វិធានការតបតវិញយ៉ាងម៉ឺងម៉ាត់» ប្រសិនបើប្លុកសម្រេចដាក់វិធានការរើសអើងថ្មី ប្រឆាំងនឹងប្រទេសចិន។

ដោយសំអាង​ដល់​សម្តីបុគ្គល​ដែលដឹង​បញ្ហានេះ សារព័ត៌មាន Bloomberg បានរាយការណ៍នៅ​មុននេះ​ថា មន្ត្រី​ EU កំពុងស្វែងរកវិធានការថ្មី ដើម្បីការពារសេដ្ឋកិច្ចរបស់ប្លុក ទល់​នឹង​​ការហូរចូលនៃទំនិញចិន។

មន្ត្រីរបស់​ប្លុក​នេះ នឹងជជែកដេញដោល​ អំពីបញ្ហានេះ នៅក្នុងកិច្ចប្រជុំមួយនៅថ្ងៃទី២៩ ខែឧសភា។ ប្លុកនឹងវាយតម្លៃថា តើនីតិ​វិធី​អ្វី​ដែលរដ្ឋជាសមាជិកមានឆន្ទៈ ក្នុងការដាក់ចេញ​ ដើម្បី​ទប់​ទល់​នឹង​ការ​ផ្គង់ផ្គង់​លើស​តម្រូវការ​ នៅក្នុងវិស័យផលិតកម្មរបស់ចិន។ ហើយ​មេដឹកនាំ EU ត្រូវបានគេរំពឹងថា នឹងលើកយកបញ្ហានេះមក​ជជែក ក្នុងកិច្ចប្រជុំកំពូលបន្ទាប់ នៅខែមិថុនា។

គួរបញ្ជាក់ថា ភាពតានតឹងពាណិជ្ជកម្មជាមួយ EU កំពុងកើនឡើង ទោះបីជាប្រទេសចិន និងសហរដ្ឋអាមេរិកបន្តការចរចា ដើម្បីបន្ថែម​ពេល​វេលា​នៃ​ការ​ផ្អាក​ជម្លោះ​ពាណិជ្ជកម្ម បន្ទាប់ពីមាន​ដំណើរទស្សនកិច្ចរបស់ប្រធានាធិបតី កលោក​ Donald Trump ក៏ដោយ៕