ក្រុម​នៃ​ភាគហ៊ុនិក (ម្ចាស់ភាគហ៊ុន) របស់​ក្រុម​ហ៊ុន​ Samsung Electronics នៅ​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) នេះ​ បានប្ដេជ្ញាចាត់វិធានការផ្លូវច្បាប់ ជំទាស់​នឹងកិច្ចព្រមព្រៀងបណ្ដោះអាសន្ន រវាងក្រុមហ៊ុនផលិតបន្ទះឈីបលំដាប់យក្ស​របស់ប្រទេស​កូរ៉េខាងត្បូង និងសហជីពកម្មករដ៏​ធំបំផុតរបស់ខ្លួន ជាការ​ស្រុះស្រួល​​​ដែលបានជួយ​បញ្ចៀស​មិន​ឲ្យ​មាន​ការធ្វើកូដកម្មដ៏ធំមួយ។

កិច្ចព្រមព្រៀងនាទីចុងក្រោយ ពាក់​ព័ន្ធនឹង​ប្រាក់បន្ថែម​លើក​ទឹកចិត្ត​ ដែលសមាជិកសហជីព នឹងត្រូវ​ធ្វើ​ការ​បោះឆ្នោត ត្រូវបានឈានដល់កាល​ពី​យប់ថ្ងៃពុធ ដោយផែនការធ្វើកូដកម្មរយៈពេល ១៨ថ្ងៃ ចាប់ពីថ្ងៃព្រហស្បតិ៍នេះទៅ​ ត្រូវបានផ្អាករហូតដល់មានការជូនដំណឹងបន្ថែម។

ជម្លោះនេះកើតឡើងស្រប​ពេល​មាន​ការរីកចម្រើនបញ្ញាសិប្បនិម្មិត (AI) សកល ដែលបានជួយ​ឲ្យ​អាជីវកម្មរបស់ក្រុម​ហ៊ុន​ Samsung កាន់តែ​ប្រសើរ​ឡើង​ ខណៈពេលដែលជំរុញកំណើនសេដ្ឋ​កិច្ច​ជាតិ និងទីផ្សារភាគហ៊ុន។ កម្មករប្រហែល ៥០.៥០០នាក់ ត្រូវបានកំណត់ដើរ​ចេញ​ពីការងារ​ ខណៈដែលកំហឹងបានផ្ទុះឡើង ពាក់​ព័ន្ធ​នឹង​របៀបដែលក្រុមហ៊ុនបែង​ចែក​ប្រាក់ចំណេញដ៏ច្រើនរបស់ខ្លួន។

ក្រោមកិច្ចព្រមព្រៀងបណ្ដោះអាសន្ន រវាងក្រុម​ហ៊ុន​ Samsung និងសហជីព ប្រាក់ឈ្នួលនឹងកើនឡើង ហើយប្រាក់បន្ថែម​លើក​ទឹកចិត្ត​ពិសេស នឹងត្រូវបានបង់ដោយផ្នែក នៅក្នុងភាគហ៊ុនរបស់ក្រុមហ៊ុនរយៈពេល ១០​ឆ្នាំ។

ទីស្នាក់ការកណ្តាលសកម្មភាពភាគហ៊ុនិក​កូរ៉េ (Korea Shareholder Action Headquarters) ដែលជាក្រុមភាគហ៊ុនិក នៅ​ថ្ងៃព្រហស្បតិ៍ បានធ្វើបាតុកម្មតវ៉ាជំទាស់​នឹង​កិច្ចព្រមព្រៀងនេះ នៅជិតនិវេសដ្ឋាន​របស់លោក Lee Jae-yong ដែលជា​ប្រធានក្រុមហ៊ុន Samsung Electronics។

ពួកគេបាននិយាយថា ការចរចា ជុំវិញ​​ប្រាក់បន្ថែម​លើក​ទឹក​ចិត្ត ដែលភ្ជាប់ជាមួយប្រាក់ចំណេញប្រតិបត្តិការ មិនត្រូវបានអនុម័តនៅក្នុងសេចក្តីសម្រេចរបស់ភាគហ៊ុនិកទេ ដូច្នេះហើយ មិនមាន «សុពលភាពផ្នែកច្បាប់» ក្រោមច្បាប់ពាណិជ្ជកម្មបច្ចុប្បន្នឡើយ​។

ក្រុមនេះបានប្ដេជ្ញា «ប្រើប្រាស់មធ្យោបាយផ្នែកច្បាប់ដែលមានទាំងអស់» ដើម្បី «រារាំងការចំណាយមូលនិធិ​ណាមួយ​របស់ក្រុមហ៊ុន» ដោយផ្អែកលើកិច្ចព្រមព្រៀង ប្រសិនបើវាត្រូវបានបញ្ចប់ដោយ «រំលង» នីតិវិធីដែលត្រូវការទាំងនេះ៕