ប្រភពជាន់ខ្ពស់អ៊ីរ៉ង់ ២រូប បានប្រាប់​ឲ្យ​ដឹង​ថា មេដឹកនាំកំពូលអ៊ីរ៉ង់ បានចេញសេចក្តីណែនាំមួយថា សារធាតុ​អ៊ុយរ៉ានី​ញ៉ូមកម្រិតជិតដល់ការ​ផលិត​អាវុធរបស់ប្រទេសនេះ មិនគួរត្រូវបានបញ្ជូនទៅក្រៅប្រទេសឡើយ​ ដែលជាការពង្រឹងជំហររឹង​ត្អឹង​របស់ទីក្រុងតេអេរ៉ង់ ចំពោះ​ការទាមទារចម្បងដោយ​សហរដ្ឋអាមេរិក នៅក្នុងដំណើរការ​ចរចាសន្តិភាព។

បទបញ្ជារបស់លោក​ Ayatollah Mojtaba Khamenei អាចធ្វើឲ្យ​ប្រធានាធិបតីអាមេរិក លោក​ Donald Trump មាន​ការ​ខឹង​សម្បា​បន្ថែមទៀត និងធ្វើឲ្យ​កាន់តែ​ស្មុគស្មាញដល់កិច្ចចរចា ស្តីពីការបញ្ចប់សង្គ្រាមអាមេរិក-អ៊ីស្រាអែល ប្រឆាំង​នឹង​អ៊ីរ៉ង់។

ដោយ​បាននិយាយក្នុងលក្ខខណ្ឌមិនបញ្ចេញឈ្មោះ ប្រភពមួយ​ ក្នុងចំណោមប្រភពអ៊ីរ៉ង់​ទាំង​២ នោះ​ បាននិយាយថា៖ «ការណែនាំរបស់មេដឹកនាំកំពូល និងការឯកភាពគ្នា នៅក្នុងរង្វង់​ស្ថាប័ន គឺថា ការស្តុកសារធាតុ​អ៊ុយរ៉ានី​ញ៉ូមចម្រាញ់រួចហើយ មិនគួរនៅក្រៅ​ប្រទេសនោះទេ»។

ប្រភពទាំងនេះ​ បានឲ្យ​ដឹង​បន្ថែម​ថា មន្ត្រីជាន់ខ្ពស់របស់អ៊ីរ៉ង់ ជឿថា ការបញ្ជូនសម្ភារៈទៅក្រៅប្រទេស នឹងធ្វើឲ្យ​ប្រទេសនេះងាយរងគ្រោះ ដោយសារ​ការវាយប្រហារនាពេលអនាគត ដោយសហរដ្ឋអាមេរិក និងអ៊ីស្រាអែល។ លោក Khamenei មានសិទ្ធិនិយាយចុងក្រោយ លើបញ្ហាសំខាន់ៗបំផុតរបស់​រដ្ឋ​។ សេតវិមាន និងក្រសួងការបរទេសអ៊ីរ៉ង់ មិនបានឆ្លើយតបទៅនឹងសំណើសុំការអត្ថាធិប្បាយឡើយ ពាក់ព័ន្ធ​នឹង​ការលើក​ឡើង​នេះ​​៕