ក្រុមបាល់ទាត់ជម្រើសជាតិអ៊ីរ៉ង់ នៅថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) នេះ បានដាក់ពាក្យសុំទិដ្ឋាការនៅស្ថានទូតអាមេរិក ប្រចាំ​​ទីក្រុង Ankara របស់ប្រទេស​ទួរគី មុនព្រឹត្តិការណ៍ FIFA World Cup ឆ្នាំ២០២៦។​ នេះបើយោងតាមប្រព័ន្ធផ្សព្វផ្សាយក្នុងស្រុក។

ការប្រកួត​បាល់ទាត់​ដ៏​ធំ​របស់​ពិភពលោកនេះ នឹងត្រូវធ្វើ​ម្ចាស់​រួមគ្នាដោយសហរដ្ឋអាមេរិក កាណាដា និងម៉ិកស៊ិក ចាប់ពីថ្ងៃទី១១ ខែមិថុនា ដល់ថ្ងៃទី១៩ ខែកក្កដា។

សមាជិកនៃក្រុមអ៊ីរ៉ង់ បានទៅ​ដល់ស្ថានទូតក្នុងរដ្ឋធានីរបស់​ទួរគី ដើម្បីបំពេញនីតិវិធីសុំ​ទិដ្ឋាការ។ នៅពេលដែលពួកគេចាកចេញពីអគារ កីឡាករបានញញឹមនៅពេលដែលអ្នកសារ​ព័ត៌មានសួរថា តើពាក្យសុំរបស់ពួកគេ ត្រូវបានអនុម័តដែរ ឬអត់។ ក្រុមនេះបានរៀបចំជំរំហ្វឹកហាត់ នៅទីក្រុងរមណីយដ្ឋាន Antalya របស់ទួរគី ចាប់តាំងពីថ្ងៃទី១៩ ខែឧសភា។

លោក Mehdi Mohammad Nabi អនុប្រធានទី១ នៃសហព័ន្ធបាល់ទាត់អ៊ីរ៉ង់ នៅ​មុននេះ​បាននិយាយថាក្រុមនឹងធ្វើដំណើរទៅកាន់ទីក្រុង Ankara ដើម្បីបំពេញនីតិវិធីសុំ​ទិដ្ឋាការ ទាំងសហរដ្ឋអាមេរិក និងកាណាដា សម្រាប់សមាជិកក្រុមទាំងអស់។

លោកបានបន្ថែមថា កីឡាករដែលមានមូលដ្ឋាននៅបរទេសជាច្រើនរូប​ ក៏ត្រូវបានគេរំពឹងផង​ដែរ​ថា នឹងចូលរួមជាមួយគណៈប្រតិភូ សម្រាប់ដំណើរការ និងពិធីការផ្សេងៗទៀត៕