នៅ​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) នេះ ចក្រភពអង់គ្លេសបានកោះអញ្ជើញ​ប្រេសិតអ៊ីស្រាអែល ដើម្បីបង្ហាញ​ក្ដី​ព្រួយបារម្ភ និងទាមទារឲ្យមាន​ការពន្យល់ អំពីការប្រព្រឹត្តិ ចំពោះសកម្មជនកងនាវាផ្ដល់​ជំនួយ Global Sumud ដែលធ្វើដំណើរឆ្ពោះ​ទៅកាន់តំបន់​ហ្កាហ្សា។

នៅក្នុងសេចក្តីថ្លែងការណ៍មួយ ក្រសួងការបរទេសបានឲ្យ​ដឹង​ថា ខ្លួនបានកោះអញ្ជើញ​ភារធារីអ៊ីស្រាអែល បន្ទាប់ពីមាន​នូវ​ «វីដេអូបង្កហេតុ​ដែលបង្ហោះដោយរដ្ឋមន្ត្រី (សន្តិសុខជាតិ) អ៊ីស្រាអែល លោក Itamar Ben-Gvir»។

សេចក្ដីថ្លែង​ការណ៍​បានកត់សម្គាល់ថា៖ «ការកោះហៅនេះ ឆ្លុះបញ្ចាំងពីការថ្កោលទោសយ៉ាងខ្លាំងរបស់ចក្រភពអង់គ្លេស ចំពោះអាកប្បកិរិយារបស់លោក ក្នុងការចំអកអ្នកដែលពាក់ព័ន្ធនឹងកងនាវា​ផ្ដល់​ជំនួយ​ Global Sumud។ អាកប្បកិរិយានេះ រំលោភលើស្តង់ដារជាមូលដ្ឋានបំផុតនៃការគោរព និងសេចក្តីថ្លៃថ្នូរសម្រាប់មនុស្ស»។

សេចក្តីថ្លែងការណ៍បានបន្ថែមថា៖ «យើងក៏មានក្ដី​បារម្ភយ៉ាងខ្លាំងផង​ដែរ ចំពោះស្ថានភាព​នៃការឃុំខ្លួនដែលបានបង្ហាញ ហើយបានទាមទារឲ្យមាន​ការពន្យល់ពីអាជ្ញាធរអ៊ីស្រាអែល»។

ក្រសួងការបរទេសបានគូសបញ្ជាក់ថា ខ្លួនបានបញ្ជាក់យ៉ាងច្បាស់ អំពីកាតព្វកិច្ចរបស់ពួកគេ ក្នុងការការពារសិទ្ធិរបស់អ្នកដែលពាក់ព័ន្ធទាំងអស់។

គួរបញ្ជាក់​ថា លោក Ben-Gvir បានបង្ហោះវីដេអូនេះនៅលើបណ្តាញសង្គមកាលពីថ្ងៃពុធ ដោយបង្ហាញខ្លួនឯង កំពុងចំអកឲ្យ​សកម្មជនគាំទ្រប៉ាឡេស្ទីន ដែលត្រូវបានចងក្រពាត់ដៃ​ទៅ​ក្រោយ​ និងបង្ខំឲ្យ​លុតជង្គង់បន្ទាប់ពីត្រូវបានឃុំខ្លួនដោយកងកម្លាំងអ៊ីស្រាអែលនៅក្នុងដែនទឹកអន្តរជាតិ។ រដ្ឋមន្ត្រីរូបនេះ បានបង្កឲ្យ​មានការខឹងសម្បា ទាំងក្នុងស្រុក និងអន្តរជាតិ បន្ទាប់ពីរូប​លោក​បានបង្ហោះវីដេអូរយៈពេល ១នាទីនោះ​។

កងនាវាដែលដឹកមនុស្ស ៤២៨នាក់ មកពី ៤៤ប្រទេស បានចេញដំណើរកាលពីថ្ងៃព្រហស្បតិ៍សប្តាហ៍មុនពីតំបន់​ Marmaris របស់ប្រទេស​ទួរគី ជា​ការប៉ុនប៉ងថ្មី ដើម្បីទម្លាយ​ការបិទផ្លូវខុសច្បាប់របស់អ៊ីស្រាអែលដែលបានដាក់លើតំបន់ហ្កាហ្សា ចាប់តាំងពីឆ្នាំ២០០៧៕