ក្រសួងការពារជាតិរុស្ស៊ី បានអះអាងនៅ​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) នេះថា កងកម្លាំងរបស់ខ្លួន បានដណ្តើម​កាន់​កាប់​ទីតាំង​មួយផ្សេងទៀត នៅក្នុងតំបន់ Kharkiv ភាគខាងកើតរបស់ប្រទេសអ៊ុយក្រែន។

តាម​រយៈ​សេចក្តីថ្លែងការណ៍មួយ លើ​កម្មវិធីផ្ញើសារ​ Telegram ក្រសួងបានបញ្ជាក់​ថា ក្រុមកងកម្លាំង Sever ឬក្រុមភាគខាងជើង បានគ្រប់គ្រងភូមិ Shesterivka។ ជាមួយ​គ្នានេះ ក្រសួងក៏បានអះអាងផងដែរថា អ៊ុយក្រែនបានធ្វើការវាយប្រហារតាមអាកាសពេញមួយយប់ ដោយប្រាប់ថា យានដ្រូនចំនួន ១២១គ្រឿង ត្រូវស្ទាក់ចាប់បាន នៅទូទាំងទឹកដីរុស្ស៊ី។

ក្នុងសេចក្តីថ្លែងការណ៍ដាច់ដោយឡែក ប្រធានាធិបតីអ៊ុយក្រែន លោក​ Volodymyr Zelenskyy បានបញ្ជាក់ថា ទីក្រុងគីវបានបើកការវាយប្រហារដោយយានដ្រូន លើ​រុស្ស៊ី ដោយពណ៌នាអំពីប្រតិបត្តិការ​ថា ជា «ទណ្ឌកម្មរយៈចម្ងាយឆ្ងាយ»។

បើ​យោងតាមលោក Zelenskyy បាន​ឲ្យ​ដឹង​ថា រោងចក្រចម្រាញ់ប្រេងធំជាងគេមួយរបស់រុស្ស៊ី នៅក្នុងទីក្រុង Syzran ក្នុងតំបន់ Samara ត្រូវរង​ខូចខាតយ៉ាងធ្ងន់ធ្ងរ ដោយសារ​ការវាយប្រហារនេះ។

យ៉ាង​ណាក្ដី ការផ្ទៀងផ្ទាត់ឯករាជ្យ ជុំវិញ​ការអះអាងពីភាគី​ទាំង២ នៅតែជួបការលំបាក ដោយសារតែសង្គ្រាមកំពុងបន្តមាន​៕