មានមនុស្សយ៉ាងហោចណាស់ ៤នាក់ បានបាត់បង់ជីវិត​ និង ៦នាក់ផ្សេងទៀត រងរបួស នៅពេលដែលអគារកម្ពស់​ ៤ជាន់មួយ​ខ្នង បានបាក់​រលំ នាពេល​យប់ នៅក្នុងទីក្រុង Fez ដោយ​មាន​ចម្ងាយប្រហែល ២០០គីឡូម៉ែត្រ នៅ​ភាគខាងកើតនៃទីក្រុង Rabat របស់ប្រទេសម៉ារ៉ុក។ នេះបើយោងតាមការ​ឲ្យ​ដឹង​ពី​អាជ្ញាធរមូលដ្ឋាន កាល​ពី​ថ្ងៃពុធ (ទី២០ ខែឧសភា ឆ្នាំ២០២៦)។

ប្រព័ន្ធផ្សព្វផ្សាយរដ្ឋ 2M បានរាយការណ៍​ថា មាន​អ្នក​ស្លាប់​ ១១នាក់ មុនពេលចេញការកែតម្រូវជាផ្លូវការ។ អាជ្ញាធរបានឲ្យ​ដឹង​ថា ការស្វែងរកអ្នកផ្សេងទៀតដែលអាចកប់​នៅ​ក្រោម​អគារ​នោះ​ កំពុងបន្ត។ ប្រព័ន្ធផ្សព្វផ្សាយ បានបង្ហាញវីដេអូរបស់អ្នកជួយសង្គ្រោះ និងអ្នកស្រុក កំពុងជីកកកាយតាមគំនរបាក់បែក។

អាជ្ញាធរ បាន​បញ្ជាក់​ថា ការស៊ើបអង្កេតមួយត្រូវបានចាប់ផ្តើមឡើង ពាក់ព័ន្ធ​នឹង​ឧប្បត្តិហេតុនេះ ហើយអ្នកស្រុកនៅ​ក្បែរ​អគារជាប់គ្នា ត្រូវបានសុំ​ឲ្យ​ចាក​ចេញជាការប្រុងប្រយ័ត្ន ដោយ​ភ័យ​ខ្លាច​ថា មាន​ការ​បាក់​រលំបន្ថែមទៀត។

ទីក្រុង Fez ជាអតីតរដ្ឋធានីដែលមានអាយុកាលតាំងពីសតវត្សរ៍ទី៨ និងជាទីក្រុងដែលមានប្រជាជនច្រើនបំផុតទី៣ របស់ប្រទេស បានឃើញមាន​ឧប្បត្តិហេតុស្រដៀងគ្នានេះ ក្នុងរយៈពេលប៉ុន្មានខែថ្មីៗនេះ ក្នុង​នោះ​រួមទាំងហេតុកាណ៍​ ក្នុងខែធ្នូ ឆ្នាំ២០២៥ នៅពេលដែលអគារចំនួន ២ បានបាក់​រលំ ដោយបានធ្វើ​ឲ្យ​មនុស្សយ៉ាងហោចណាស់ ២២នាក់ស្លាប់​៕