អង្គការលើកលែងទោសអន្តរជាតិ (Amnesty International) នៅ​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) នេះ បានអំពាវនាវដល់អាជ្ញាធរអ៊ីស្រាអែលឲ្យ​បញ្ឈប់ផែនការបង្ខំ​ប្រជាជនប៉ាឡេស្ទីនឲ្យ​ផ្លាស់​​ទីលំនៅ​ចេញពីសហគមន៍ Bedouin របស់​​ភូមិ Khan al-Ahmar នៅភាគខាងកើតនៃទី​ក្រុងហ្ស៊េរុយ​សាឡឹមខាងកើត (East Jerusalem) ដែលត្រូវបាន​កាន់កាប់ ដោយព្រមានថា វិធានការឲ្យ​រើ​ចេញ​​នេះ អាចស្មើនឹង «ឧក្រិដ្ឋកម្មសង្គ្រាម»។

តាម​រយៈ​ការបង្ហោះមួយនៅលើបណ្ដាញ​សង្គម X អង្គការនេះ បានលើក​ឡើង​ថា រដ្ឋមន្ត្រីក្រសួងហិរញ្ញវត្ថុអ៊ីស្រាអែល លោក​ Bezalel Smotrich បានណែនាំការចាប់ផ្តើមនីតិវិធី ដើម្បី​ឲ្យប្រជាជនផ្លាស់​ទីលំនៅ​ដោយ​បង្ខំ និងបំផ្លាញ​ទ្រព្យសម្បត្តិរបស់ពួកគេ។

អង្គការលើកលែងទោសអន្តរជាតិនេះ បាន​ឲ្យ​ដឹង​ទៀត​ថា លោក​ Smotrich បានភ្ជាប់ចំណាត់ការ​នេះ ទៅនឹងរបាយការណ៍ ទាក់ទងនឹងសំណើរបស់រដ្ឋ​អាជ្ញានៃតុលាការព្រហ្មទណ្ឌអន្តរជាតិ (ICC) ដើម្បី​ឲ្យ​ចេញដីកាចាប់ខ្លួន ចំពោះ​រូប​លោក ពាក់ព័ន្ធ​នឹង​ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។

អង្គការលើកលែងទោសអន្តរជាតិបានសង្កត់ធ្ងន់​ថា «ការបង្ខំ​ឲ្យ​រើ​ចេញ​ដោយ​ខុសច្បាប់នេះ គឺជាឧក្រិដ្ឋកម្មសង្គ្រាម ហើយអាចបង្កើតបាន​ជាឧក្រិដ្ឋកម្មប្រឆាំងមនុស្សជាតិ» ដោយពិពណ៌នាអំពីការគំរាមកំហែងឲ្យ​ផ្លាស់ទីលំនៅនេះ​ថា ជា «វិធានការសងសឹកប្រឆាំងនឹងយុត្តិធម៌អន្តរជាតិ ដែល​បង្ហាញពីវិសាលភាពនៃការមិនអើពើរបស់អ៊ីស្រាអែល ចំពោះច្បាប់អន្តរជាតិ។

អង្គការនេះបានអំពាវនាវឲ្យ​សហគមន៍អន្តរជាតិចាត់វិធានការ​​ «បន្ទាន់» ដើម្បីការពារប្រជាជនប៉ាឡេស្ទីន និងបានជំរុញឲ្យ​រដ្ឋភាគី នៅ​ ICC បដិសេធវិធានការសងសឹកណាមួយ ប្រឆាំងនឹងតុលាការនេះ​ ហើយ​គាំទ្រកិច្ចប្រឹងប្រែងយក​​អ្នកដែលត្រូវបានចោទប្រកាន់ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិឲ្យ​ទៅ​ទទួលខុសត្រូវ ចំពោះមុខ​ច្បាប់៕