ទីក្រុងប៉េកាំង បាននិយាយកាលពីថ្ងៃព្រហស្បតិ៍ ​​២១​ ឧសភា​​សប្ដាហ៍នេះ​​ ​ថា ​នាយករដ្ឋមន្ត្រីប៉ាគីស្ថាន លោក Shehbaz Sharif នឹងទៅទស្សនកិច្ចប្រទេសចិនចាប់ពីថ្ងៃទី២៣ ដល់ថ្ងៃទី២៦​ ខែឧសភាខាងមុខ​​នេះ​​ ប៉ុន្តែ​​ពុំ​​បានបញ្ជាក់ទេ​ ថាសង្គ្រាមនៅអ៊ីរ៉ង់ នឹងត្រូវលើ​ក​​យកទៅ​ពិភាក្សា ឬអត់។​​

ទីក្រុងអ៊ីស្លាម៉ាបាដ និងទីក្រុងប៉េកាំង ​បានស្វែងរកការសម្របសម្រួលក្នុងជម្លោះមជ្ឈិមបូព៌ា ដែលបង្កឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់កាលពីចុងខែកុម្ភៈ​​​២០២៦​។

កិច្ចព្រមព្រៀងឈប់បាញ់ចាប់តាំងពីថ្ងៃទី ៨ ខែមេសា​​​ឆ្នាំនេះ ​ បានបញ្ឈប់អរិភាព ប៉ុន្តែប្រធានាធិបតីអាមេរិក លោក Donald Trump បានព្រមានកាលពីថ្ងៃពុធសប្ដាហ៍នេះដែរ​ថា ​ទ្វារ​សម្រាប់ការទូតកំពុងបិទ។

អ្នកនាំពាក្យក្រសួងចិនខាងលើ​​​ លោក Guo Jiakun បាន​ឲ្យ​ដឹងថា​ ​មេដឹកនាំចិន និងប៉ាគីស្ថាននឹងមានការផ្លាស់ប្តូរទស្សនៈស៊ីជម្រៅលើទំនាក់ទំនងទ្វេភាគី និងបញ្ហាដែលជាកង្វល់រួម។

ប៉ាគីស្ថាន​បាន​បង្កើន​​ល្បឿន​ផ្នែក​​​​​​ការទូត​កាលពី​ថ្ងៃព្រហស្បតិ៍សប្ដាហ៍នេះ​​​ ដើម្បី​ពន្លឿន​ការចរចា​សន្តិភាព​រវាង​សហរដ្ឋអាមេរិក​ និង​អ៊ីរ៉ង់ ​ទោះបីជា​ទីក្រុង​តេអេរ៉ង់​ហាក់ដូចជា​បាន​ពង្រឹង​ជំហរ​របស់ខ្លួន​លើ​បញ្ហា​នុយក្លេអ៊ែរ​ ​ស្រប​​ពេល​មាន​ការគំរាម​វាយប្រហារជា​​ថ្មី​ពី​ប្រធានាធិបតី​អាមេរិក ​ប្រសិនបើ​លោក​មិន​ទទួលបាន​ចម្លើយ​ត្រឹមត្រូវ ​ក៏ដោយ​៕