លោក Marco Rubio រដ្ឋមន្ត្រីការបរទេសអាមេរិក បាននិយាយកាលពីថ្ងៃព្រហស្បតិ៍ ២១​​​ឧសភា សប្ដាហ៍នេះ​​ថា លទ្ធភាពនៃកិច្ចព្រមព្រៀងដែលបានចរចាជាមួយប្រទេសគុយបា នៅ​ទាប​នៅឡើយ​ក្នុង​ពេលនេះ។

លោក Rubio បានប្រាប់ក្រុម​​អ្នកសារ​​ព័ត៌មានមុនពេលចាកចេញទៅកិច្ចប្រជុំរដ្ឋមន្ត្រីការបរទេសណាតូនៅប្រទេសស៊ុយអែតថា ក្នុងពេលនេះ ពួកលោក​​នឹងបន្តធ្វើអ្វីដែលត្រូវធ្វើ។ ​

សហរដ្ឋអាមេរិកថ្មីៗនេះបានចោទប្រកាន់មេដឹកនាំបដិវត្តន៍គុយបា លោក Raul Castro ពាក់ព័ន្ធនឹងការបាញ់ទម្លាក់យន្តហោះពីរគ្រឿងដោយ​​យោធាគុយបាកាលពី៣០​ឆ្នាំមុន និងបានបញ្ជូនក្រុមនាវា​ ផ្ទុកយន្តហោះវាយ​​ប្រហារ​ Nimitz ទៅកាន់តំបន់សមុទ្រ​​ការ៉ាអ៊ីព​ ជា​​សកម្មភាព​​ ដែលត្រូវបានគេមើលឃើញថាជាផ្នែកមួយនៃយុទ្ធនាការដាក់សម្ពាធកាន់តែទូលំទូលាយប្រឆាំងនឹងប្រទេសគុយបា។

ទោះជាយ៉ាងណាក៏ដោយ ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធសប្ដាហ៍នេះ​​​ថា នឹងមិនមានការកើនឡើងភាព​តានតឹង​នៅក្នុងប្រទេសគុយបាទេ។

ប្រធានាធិបតីគុយបា លោក Miguel Diaz-Canel នៅថ្ងៃដដែលនោះ បាន​​​ស្ដីបន្ទោស​​​ការ​​​​​ចោទប្រកាន់របស់រដ្ឋាភិបាលអាមេរិកលើមេដឹកនាំបដិវត្តន៍គុយបា លោក Castro ដោយសង្កត់ធ្ងន់ថា ប្រជាជនគុយបានឹងមិនអត់ឱនចំពោះការប្រមាថប្រឆាំងនឹងប្រវត្តិសាស្ត្រ និងវីរបុរសជាតិរបស់ពួកគេឡើយ។​

លោកក៏បានហៅ​​​​​​ការចោទប្រកាន់របស់សហរដ្ឋអាមេរិកលើលោក Castro ថាជា «ល្បិចកលនយោបាយ» ដែលគ្មានមូលដ្ឋានច្បាប់​ផងដែរ​ ​ ដោយបន្ថែមថា ទីក្រុងវ៉ាស៊ីនតោន «កំពុងកុហក និងរៀបចំព្រឹត្តិការណ៍ជុំវិញការបាញ់ទម្លាក់យន្តហោះខ្នាត​​តូច ​ដែលជាកម្មសិទ្ធិរបស់អង្គការភេរវកម្មគ្រឿងញៀន Brothers to the Rescue៕