សហរដ្ឋអាមេរិកបានច្រានចោលដែលថា ការលុបចោលទណ្ឌកម្មប្រឆាំង លោកស្រី Francesca Albanese អ្នករាយការណ៍ពិសេសរបស់អង្គការសហប្រជាជាតិប្រចាំដែនដីប៉ាឡេស្ទីន គឺជាការផ្លាស់ប្តូរគោលនយោបាយរបស់រដ្ឋាភិបាល។

កាលពីថ្ងៃព្រហស្បតិ៍ ក្រសួងការបរទេសបានបញ្ជាក់ថា រដ្ឋបាលរបស់ប្រធានាធិបតី លោក ដូណាល់ ត្រាំ បានដកលោកស្រី Albanese ចេញពីបញ្ជីទណ្ឌកម្ម ដោយសារតែការចេញសេចក្តីសម្រេចរបស់តុលាការកាលពីពេលថ្មីៗនេះ។ ក្រសួងការបរទេសបាននិយាយបន្ថែមនៅក្នុងសេចក្តីថ្លែងការណ៍ថា «រដ្ឋាភិបាលបានប្តឹងឧទ្ធរណ៍ចំពោះសេចក្តីបង្គាប់របស់តុលាការ» មុនពេលបញ្ជាក់ជាថ្មីអំពីបំណងរបស់ខ្លួនក្នុងការដាក់លោកស្រី Albanese ទៅក្នុងបញ្ជីជាថ្មីនៃជនជាតិដែលកំណត់គោលដៅពិសេស (SDNs)។

រដ្ឋបាលលោក Trump បានកំណត់គោលដៅលើលោកស្រី Albanese ដោយការដាក់ទណ្ឌកម្មកាលពីក្នុងខែកក្កដា ឆ្នាំ ២០២៥ បន្ទាប់ពីលោកស្រីបាននិយាយថា តុលាការព្រហ្មទណ្ឌអន្តរជាតិ (ICC) ចេញដីកាចាប់ខ្លួនមន្ត្រីអ៊ីស្រាអែល រួមទាំងនាយករដ្ឋមន្ត្រី លោក Benjamin Netanyahu។

លោកស្រី Albanese ជាអ្នកជំនាញសិទ្ធិមនុស្ស បានរិះគន់ខ្លាំងៗចំពោះគោលនយោបាយរបស់អ៊ីស្រាអែលលើប្រជាជនប៉ាឡេស្ទីន ហើយលោកស្រីបានចេញរបាយការណ៍ដែលចងក្រងឯកសារអំពីអំពើប្រល័យពូជសាសន៍ជាបន្តបន្ទាប់របស់អ៊ីស្រាអែលនៅក្នុងតំបន់ហ្កាហ្សា ខណៈចំនួនអ្នកស្លាប់ជាពលរដ្ឋប៉ាឡេស្ទីននៅក្នុងដែនដីតូចចង្អៀតមួយនេះ ត្រូវបានគេប៉ាន់ប្រមាណថាមានលើសពី ៧៥.០០០ នាក់។