អ្នកស្រី Hala Farah ដែលជាម្តាយមានកូនពីរនាក់នៃប្រទេសលីបង់ កំពុងប្រមូលរូបថត និងវីដេអូ ដើម្បីរក្សាការចងចាំអំពីស្រុកកំណើតរបស់ខ្លួន និងស្រុកជាច្រើនទៀតនៅតាមបណ្តោយព្រំដែនភាគខាងត្បូង ត្រូវបានបំផ្លាញទាំងស្រុងដោយកងកម្លាំងអ៊ីស្រាអែល។

សក្ខីកម្មពីអ្នកស្រុក និងមន្ត្រី ក៏ដូចជារូបភាពផ្កាយរណប និងរូបថតដែលថតដោយអ្នកកាសែត AFP នៅសងខាងនៃព្រំដែន បង្ហាញពីការបំផ្លិចបំផ្លាញយ៉ាងទូលំទូលាយនៅក្នុងទីក្រុង និងភូមិរាប់សិបរបស់លីបង់ចាប់តាំងពីការចាប់ផ្តើមនៃសង្គ្រាមរវាងអ៊ីស្រាអែលនិងក្រុមហេសបូឡា នៅថ្ងៃទី ០២ ខែមីនា។

ដោយឆ្លើយតបទៅនឹងការវាយប្រហាររបស់ក្រុមហេសបូឡា អ៊ីស្រាអែលបានធ្វើការវាយប្រហារតាមអាកាសយ៉ាងច្រើន និងបានចាប់ផ្តើមការឈ្លានពានដីគោកនៅភាគខាងត្បូង ដែលមានព្រំប្រទល់ជាប់នឹងអ៊ីស្រាអែល និងជាទីតាំងរបស់ចលនាដែលគាំទ្រដោយអ៊ីរ៉ង់ដ៏មានឥទ្ធិពលនេះ។

ខណៈពេលដែលបទឈប់បាញ់ បានចាប់ផ្តើមនៅថ្ងៃទី ១៧ ខែមេសា ការបំផ្លិចបំផ្លាញ ការរុះរើ និងការឈូសឆាយនៅតំបន់ភាគខាងត្បូង បានកើនឡើងកាន់តែខ្លាំងឡើង ដែលប៉ះពាល់ដល់ផ្ទះសម្បែង ហេដ្ឋារចនាសម្ព័ន្ធ សាលារៀន ទីកន្លែងគោរពបូជា និងដីស្រែចម្ការជាដើម។

គួរបញ្ជាក់ផងដែរ កងទ័ពអ៊ីស្រាអែល ដែលពេលខ្លះបានចេញការព្រមានជម្លៀសមុនពេលវាយប្រហារ បាននិយាយម្តងហើយម្តងទៀតថា ការវាយប្រហាររបស់ខ្លួន ផ្តោតលើទីតាំង និងប្រតិបត្តិកររបស់ក្រុមហេសបូឡា គឺមិនមែនកំណត់គោលដៅលើជនស៊ីវិលនោះទេ៕