ក្រុមអ្នកគាំទ្រ និងកីឡាកររបស់ Aston Villa បាននាំគ្នាអបអរសាទរយ៉ាងកក្រើកតាមដងផ្លូវក្នុងទីក្រុង Birmingham កាលពីថ្ងៃព្រហស្បតិ៍ បន្ទាប់ពីឈ្នះជើងឯក UEFA Europa League ជាលើកដំបូងក្នុងប្រវត្តិសាស្ត្រ។

អ្នកគាំទ្រជាច្រើនបានឈររង់ចាំតាមដងផ្លូវ និងស្រែកហ៊ោកញ្ជ្រៀវ ខណៈរថយន្តដង្ហែរបស់ក្រុមបានធ្វើដំណើរឆ្លងកាត់ទីក្រុង ក្រោយ Aston Villa យកឈ្នះក្រុម SC Freiburg ក្នុងលទ្ធផល ៣-០ នៅវគ្គផ្តាច់ព្រ័ត្រ ដែលធ្វើឡើងនៅទីក្រុង Istanbul កាលពីថ្ងៃពុធ។

ខ្សែបម្រើ Youri Tielemans, Emiliano Buendia និង Morgan Rodgers រកគ្រាប់បាល់យ៉ាងអស្ចារ្យម្នាក់មួយគ្រាប់ ជួយឲ្យគ្រូបង្វឹក Unai Emery បន្តបង្កើតកំណត់ត្រាឈ្នះពាន Europa League ជាលើកទី៥។

ជោគជ័យនេះបានបញ្ចប់ការរង់ចាំពានរង្វាន់រយៈពេល ៣០ ឆ្នាំរបស់ Aston Villa ចាប់តាំងពីពួកគេឈ្នះពានចុងក្រោយ English League Cup ក្នុងឆ្នាំ១៩៩៦ ហើយក៏ជាពានអឺរ៉ុបលើកដំបូងរបស់ក្លិប ចាប់តាំងពីឈ្នះពាន European Cup ឆ្នាំ១៩៨២ ក្រោយផ្តួលក្រុម FC Bayern Munich នៅវគ្គផ្តាច់ព្រ័ត្រ៕ អត្ថបទ៖នាង សុភាវុធ