រដ្ឋមន្ត្រីស្តីទីកងទ័ពជើងទឹករបស់​សហរដ្ឋអាមេរិក កាលពីថ្ងៃព្រហស្បតិ៍ (ទី២១ ខែឧសភា) បាន​ប្រាប់​ឲ្យ​ដឹង​ថា ការលក់អាវុធទៅឲ្យ​កោះ​តៃវ៉ាន់ ត្រូវបាន «ផ្អាក» ដើម្បីធានាថា យោធាអាមេរិក មានគ្រាប់រំសេវគ្រប់គ្រាន់ សម្រាប់ប្រតិបត្តិការរបស់ខ្លួន នៅ​អ៊ីរ៉ង់។

នៅពេលត្រូវ​បាន​សួរនៅឯ​សវនាការសភា អំពីដំណើរការទិញអាវុធដែលជាប់គាំងចំនួន ១៤ពាន់លានដុល្លារ ដោយ​កោះ​តៃវ៉ាន់ រដ្ឋមន្ត្រីស្តីទី លោក​ Hung Cao បាននិយាយថា៖ «ឥឡូវនេះ យើងកំពុងផ្អាក​សិន ដើម្បីធានាថា យើងមានគ្រាប់រំសេវដែលយើងត្រូវការ សម្រាប់ប្រតិបត្តិ​ការ​ Epic Fury ដែលយើងមានក្នុង​ស្តុក​ច្រើន»។

លោក​បាន​បន្ថែម​ថា៖ «ប៉ុន្តែ យើងគ្រាន់តែធ្វើឲ្យ​ប្រាកដថា យើងមានអ្វីៗគ្រប់យ៉ាង បន្ទាប់មកការលក់ផ្នែក​យោធាទៅ​បរទេស នឹងបន្ត នៅពេលដែលរដ្ឋបាលយល់ថា មាន​ភាព​ចាំបាច់»។

ក្រសួងការបរទេសអាមេរិក និងមន្ទីរបញ្ចកោណមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ ជុំវិញ​ការកត់សម្គាល់របស់លោក Cao។ ប្រធានាធិបតីអាមេរិក Donald Trump មិនបានប្តេជ្ញាចិត្តបន្តការលក់នោះទេ ដែលបង្កើនក្ដី​បារម្ភ ចំពោះ​ការប្តេជ្ញាចិត្តរបស់លោក ក្នុងការគាំទ្រដល់កោះ​តៃវ៉ាន់ ដែលប្រទេសចិនអះអាងថា ជាទឹកដីរបស់ខ្លួន។

មុនពេលដំណើរទស្សនកិច្ចផ្លូវរដ្ឋរបស់លោកទៅកាន់ប្រទេសចិនថ្មីៗនេះ លោក Trump បាននិយាយថា លោកនឹងនិយាយជាមួយប្រធានាធិបតីចិន លោក​ Xi Jinping អំពីការលក់អាវុធ ជាការងាកចេញពីការទទូចពីមុនរបស់ទីក្រុងវ៉ាស៊ីនតោន ដែល​ថា ខ្លួននឹងមិនពិគ្រោះជាមួយទីក្រុងប៉េកាំងលើបញ្ហានេះឡើយ​។ ក្រោយមក មេដឹកនាំ​អាមេរិក​បាននិយាយថា លោកមិនបានធ្វើការប្តេជ្ញាចិត្តណាមួយ ចំពោះលោក Xi អំពីកោះ​តៃវ៉ាន់ទេ ហើយនឹងធ្វើការសម្រេចចិត្តលើការលក់អាវុធ «ក្នុងរយៈពេលសមស្រប​ដ៏ខ្លីខាងមុខ»៕