ប្រមុខ​ទីភ្នាក់ងារថាមពលអន្តរជាតិ (IEA) កាល​ពី​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) បាន​ព្រមាន​ថា ទីផ្សារប្រេងពិភពលោកប្រឈមធ្លាក់​ចូល​ទៅក្នុង​ «តំបន់ក្រហម» នារដូវក្តៅខាងមុខនេះ ប្រសិនបើមិនមានវឌ្ឍនភាពលើការបញ្ចប់សង្គ្រាមមជ្ឈិមបូព៌ាទេនោះ​។

នៅឯវិទ្យាស្ថាន​ស្រាវជ្រាវ​ Chatham House ក្នុងទីក្រុងឡុងដ្រ៍ ប្រទេស​អង់គ្លេស​ លោក Fatih Birol បាននិយាយថា៖ «យើងអាចនឹងចូលទៅក្នុងតំបន់ក្រហម (លើការផ្គត់ផ្គង់) នៅក្នុងខែកក្កដា ឬសីហា ប្រសិនបើយើងមិនឃើញថា មានភាព​ល្អ​ប្រសើរ​ខ្លះ នៅក្នុងស្ថានភាព (សង្គ្រាម) នេះ​ទេ​នោះ​»។

លោក Birol បាននិយាយថា បើ​ទោះ​ជា​ប្រេង​លើស​ចំនួន នៅក្នុងទីផ្សារមុនសង្គ្រាម បានជួយសម្រាល​ការ​រំខាន​ថាមពលភ្លាម​ៗ​ក៏ដោយ ក៏ «ស្តុកកំពុងអស់​ទៅ​ជា​លំដាប់​»។ លោកបានព្រមានថា វានឹងត្រូវការ «ពេលវេលាច្រើន» សម្រាប់ការផលិត និងសមត្ថភាពចម្រាញ់ប្រេង ដើម្បីត្រឡប់ទៅរក​កម្រិតមុនសង្គ្រាមវិញ​។

IEA បានសម្របសម្រួលឲ្យ​មាន​ការបញ្ចេញប្រេងចំនួន ៤២៦លានបារ៉ែលពីស្តុកបន្ទាន់ ដោយប្រទេសសមាជិកចំនួន ៣២ របស់ខ្លួន ហើយបានឲ្យ​ដឹង​នៅខែនេះថា ប្រហែល ១៦៤លានបារ៉ែល ត្រូវបានបញ្ចេញ​រួចហើយ។

គួរ​បញ្ជាក់​ អ៊ីរ៉ង់បានបង្អាក់​ចរាចរណ៍នាវា​ដឹក​ប្រេងឆ្លងកាត់ច្រកសមុទ្រ Hormuz យ៉ាងមានប្រសិទ្ធភាព ជាការ​សងសឹក ចំពោះការវាយប្រហាររបស់សហរដ្ឋអាមេរិក និងអ៊ីស្រាអែល ដែលបានចាប់ផ្តើមកាល​ពី​ចុងខែកុម្ភៈ ដោយ​បានបិទលំហូរ​ប្រេង និងឧស្ម័ន និងធ្វើឲ្យ​តម្លៃហក់​ឡើង។ បទឈប់បាញ់នៅថ្ងៃទី៨ ខែមេសា បានបញ្ឈប់សង្គ្រាម ប៉ុន្តែរហូតមកដល់ពេលនេះ កិច្ច​ប្រឹងប្រែងចរចាមិន​សម្រេចបានកិច្ចព្រមព្រៀងសន្តិភាពយូរអង្វែងនោះទេ​ ដែលធ្វើឲ្យមានផលប៉ះពាល់ដល់សេដ្ឋកិច្ចពិភពលោក៕