ភ្នំពេញ៖ នៅថ្ងៃទី១៩ ខែមេសានេះ គឺជាថ្ងៃទី២ ដែលគ្រប់បណ្តាកម្មករកម្មការិនីនៅតាមរោងចក្រ បានចូលបំរើការងារវិញ បន្ទាប់ពីបានឈប់សំរាកជិតមួយសប្តាហ៍ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ។

ការចូលបំរើការងារវិញជាធម្មតានេះ បណ្តារោងចក្រ មិនតម្រូវអោយកម្មករកម្មការិនី​ធ្វើតេស្ត​ពិនិត្យ​រកកូវីដ១៩ ដូចការឈប់សំរាកមុនៗនោះទេ ​ដោយសំអាងថា ​គ្រប់កម្មករ កម្មការិនី​គឺបានចាក់​វ៉ាក់សាំង​កូវីដ១៩ ទាំងអស់គ្នា។

បើតាមបណ្តារដ្ឋបាលរោងចក្រនៅក្នុងក្រុងតាខ្មៅ ខេត្តកណ្តាល បានថ្លែងប្រាប់BTVនៅថ្ងៃទី១៩ខែមេសានេះថា បន្ទាប់ពីបាន​ឈប់​សម្រាក​អបអរ​សាទរ​បុណ្យ​ចូលឆ្នាំថ្មី ​ប្រពៃណីជាតិខ្មែរ ​នៅសប្តាហ៍មុននេះ ​គឺគ្រប់កម្មករ​កម្មការិនីគ្រប់ផ្នែកទាំងអស់ បាន​ចូលបំរើការងារវិញ នៅថ្ងៃទី១៨ ខែមេសា ​ដោយមិនបានធ្វើតេស្តកូវីដនោះទេ តែបាន​តម្រូវ​ឲ្យមេក្រុមកម្មករទាំងអស់ ​គឺត្រូវតាមដានអាការៈ សុខភាព ​កម្មករកម្មការិនី​ដែលជាកូនក្រុមរបស់ខ្លួន ហើយ​ក្នុងករណីកម្មករ ​និយោជិក​ណាមានអាការៈសុខភាពមិនល្អ គឺមិនត្រូវអនុញ្ញាត​ឲ្យចូល​ធ្វើ​ការងារនោះទេ​ ហើយត្រូវធ្វើតេស្តពិនិត្យកូវីដ១៩ ជាចាំបាច់ផងដែរ។

បើតាមបណ្តាអ្នកគ្រប់គ្រងក្រុមកម្មករតូចៗ នៃរោងចក្រ ប្រូពីស័ស បានថ្លែងថា នៅថ្ងៃទី២​នៃការ​ចូលបំរើការងារវិញនេះ ​សំគាល់ឃើញថា ​គ្រប់កម្មករ ​កម្មការិនី​ ដែលជាកូនក្រុម មាន​សុខភាពល្អ​ទាំងអស់គ្នា ហើយរោងចក្រកំពុងបន្តតាមដានសុខភាពគ្នាទៅវិញទៅមកជារៀងរាល់ថ្ងៃ ហើយ​ក្នុងករណីកម្មករណាអាការៈប្លែក ​និងមានជំងឺផ្តាសសាយជាដើម គឺនឹងតម្រូវ​អោយ​គាត់ឈប់​សំរាកភ្លាម។

ឯកឧត្តម ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ ​និងបណ្តុះបណ្តាលវិជ្ជាជីវៈ បានថ្លែងថា ​នៅមុនថ្ងៃបុណ្យចូលឆ្នាំថ្មីនេះ​ ក្រសួងការងារ​ និងបណ្តុះបណ្តាលវិជ្ជាជីវៈ និង​អាជ្ញាធររាជធានីខេត្ត ​ក៏ដូចបណ្តាអ្នកគ្រប់គ្រងរោងចក្រ ​បានណែនាំ​ឱ្យបងប្អូន​ខិតខំរក្សាវិធានការ ៣កុំ ៣ការពារ​ ខណៈពេលចូលត្រឡប់​ចូលធ្វើការងារវិញ រោងចក្រមិនតម្រូវ​ឱ្យធ្វើតេស្តឡើងវិញ​លើបងប្អូនកម្មករនិយោជិកទេ​ ដោយសារបងប្អូនកម្មករនិយោជិត បានចាក់វ៉ាក់សាំង​ដូសមូល​ដ្ឋានគ្រប់ៗគ្នា ​និងបានចាក់ដូសជំរុញបានយ៉ាងច្រើនលើសលប់រួចហើយ។

ទោះយ៉ាងណាក៏ដោយ ឯកឧត្តម ហេង សួរ ក៏បានណែនាំក្រើន​រំលឹក​អោយកម្មករ និយោជិក​ទាំងអស់ ​ត្រូវបន្តស្មារតីប្រុងប្រយ័ត្ន ​ការពារខ្លួនឲ្យបាន​ខ្ជាប់ខ្ជួន​ចៀសផុត​ពីការឆ្លងកូវីដ១៩ និង​កូវីដអូមីក្រុង ហើយត្រូវនាំគ្នាបន្តចាក់វ៉ាក់សាំង​ដូសជម្រុញ​តាមការណែនាំរបស់​ក្រុម​គ្រូពេទ្យ​អោយបានត្រឹមត្រូវ ​ដើម្បីពង្រឹងភាពស៊ាំអោយបានល្អប្រសើរ៕ អត្ថបទ ស៊ុម សុខជា