រដ្ឋមន្ត្រីការបរទេសគុយបា លោក Bruno Rodriguez Parrilla កាលពីថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) បានចោទប្រកាន់រដ្ឋមន្ត្រីការបរទេសអាមេរិក លោក Marco Rubio ថា បានញុះញង់ឲ្យ​មានការកើនឡើងនូវ​ការប្រឈមមុខដាក់គ្នាខាងយោធា។

លោកបានសរសេរនៅលើបណ្ដាញ​សង្គម X ថា «ជា​ថ្មី​ម្ដង​ទៀត រដ្ឋមន្ត្រីការបរទេសអាមេរិកនិយាយ​កុហក ដើម្បីញុះញង់ឲ្យ​មានការឈ្លានពានខាងយោធា ដែលនឹងបង្កឲ្យ​មានការបង្ហូរឈាមប្រជាជន​គុយបា និងអាមេរិក»។ ការកត់សម្គាល់របស់លោកបែប​នេះ​បានកើតឡើងបន្ទាប់ពីលោក Rubio បាននិយាយថា គុយបាកំពុងបង្ក «ការគំរាមកំហែងសន្តិសុខជាតិ» ដល់សហរដ្ឋអាមេរិក។

លោក Rodriguez Parrilla បានបញ្ជាក់​ថា៖ «គុយបាមិនមែនជាការគំរាមកំហែងដល់សន្តិសុខជាតិដល់​សហរដ្ឋអាមេរិកទេ ហើយក៏មិនធ្លាប់មានការគំរាមកំហែងសន្តិសុខជាតិដល់​សហរដ្ឋអាមេរិកដែរ។ តែ​គឺរដ្ឋាភិបាលសហរដ្ឋអាមេរិកទៅវិញ​ទេ ដែលឈ្លានពានប្រជាជនគុយបាដោយ​ឥត​មេត្តា និងជាប្រព័ន្ធ ហើយក្នុងរយៈពេលប៉ុន្មានខែថ្មីៗនេះ បានចូលរួមធ្វើ​ឲ្យ​មាន​ភាពអស់សង្ឃឹមក្នុងចំណោមប្រជាជន និងការដួលរលំសេដ្ឋកិច្ច ដោយបាន​ហាមឃាត់ការនាំចូលប្រេងឥន្ធនៈ និងពង្រឹង​វិធានការបិទខ្ទប់ដែល​មិន​ស្ថិតក្នុង​ដែន​ដី​របស់ខ្លួន»​។

ជាង​នេះ​ទៀត លោក Rodriguez Parrilla ក៏បានច្រាន​ចោល​ការកំណត់ដោយ​សហរដ្ឋអាមេរិកផងដែរ ដែល​ថា គុយ​បា​ជារដ្ឋឧបត្ថម្ភភេរវកម្ម៕