សហរដ្ឋអាមេរិកបានចាប់ខ្លួនលោកស្រី Adys Lastres Morera ដែលជាប្អូនស្រីរបស់ប្រធានប្រតិបត្តិរបស់​ក្រុម​ហ៊ុន​ GAESA ដែលជាសម្ព័ន្ធក្រុមហ៊ុនដ៏ធំមហិមា​គ្រប់គ្រងដោយយោធាគុយ​បា។ នេះបើយោងតាមរដ្ឋមន្ត្រីការបរទេសអាមេរិក លោក Marco Rubio ដែល​បាន​ប្រាប់​ឲ្យ​ដឹង​កាល​ពី​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦)​។

លោកស្រី Morera ដែលបានចូលសហរដ្ឋអាមេរិកក្នុងនាមជាអ្នករស់នៅអចិន្ត្រៃយ៍ស្របច្បាប់ ក្នុងឆ្នាំ២០២៣ ឥឡូវនេះស្ថិតនៅក្នុងឃុំ​ខ្លួន​ដោយ​អាជ្ញាធរអនុវត្តច្បាប់អន្តោប្រវេសន៍ និងគយ (ICE) របស់សហរដ្ឋអាមេរិក ដោយរង់ចាំដំណើរការបណ្តេញចេញ។​ នេះបើយោងតាមសេចក្តីថ្លែងការណ៍ដាច់ដោយឡែកមួយពី ICE។

សេចក្តីថ្លែងការណ៍នេះបានបញ្ជាក់ថា វត្តមានរបស់លោកស្រី Morera បង្កការគំរាមកំហែងដល់សហរដ្ឋអាមេរិក និងធ្វើឲ្យ​ប៉ះពាល់ដល់ផលប្រយោជន៍គោលនយោបាយការបរទេសរបស់អាមេរិក។

ថ្នាក់ដឹកនាំគុយបាកម្រនិយាយជាសាធារណៈអំពីសម្ព័ន្ធ​ក្រុម​ហ៊ុន GAESA ដែលជា​អក្សរកាត់​របស់​​ Grupo de Administracion Empresarial ឬក្រុមរដ្ឋបាលអាជីវកម្ម។ វា​មាន​ការ​អះអាងជាយូរមកហើយថា ឆន្ទានុសិទ្ធិ​បែបនេះ គឺចាំបាច់ ដើម្បីទប់ទល់​នឹងការបិទខ្ទប់​ពាណិជ្ជកម្ម និងហិរញ្ញវត្ថុរបស់សហរដ្ឋអាមេរិក ដែលធ្វើឲ្យ​ស្មុគស្មាញយ៉ាងខ្លាំងដល់​អាជីវកម្មរបស់កោះនេះជាមួយពិភពខាងក្រៅ៕