សហភាពអឺរ៉ុប (EU) នឹងស្នើឲ្យ​មាន​ការ​លើកលែងទណ្ឌកម្មជាបណ្ដោះអាសន្ន លើអ្នកផ្គត់ផ្គង់បន្ទះឈីប​ដ៏សំខាន់របស់ប្រទេសចិន បន្ទាប់ពីក្រុមហ៊ុនផលិតរថយន្ត បានព្រមានអំពីភាពវឹកវរនៃខ្សែច្រវាក់​ផ្គត់ផ្គង់ដែលនឹងកើតមាន​ ប្រសិនបើការហាមឃាត់មិនត្រូវបានលុប​ទេនោះ​។

យោងតាមប្រភពដែលដឹង​ពីបញ្ហានេះ បាន​ប្រាប់​ថា គណៈកម្មការអឺរ៉ុប ដែលជាអង្គភាព​ប្រតិបត្តិរបស់ EU នឹងស្នើឲ្យ​មានការលើកលែង សម្រាប់ក្រុមហ៊ុនផលិតបន្ទះឈីប Yangzhou Yangjie Electronic Technology នៅដើមសប្តាហ៍នេះ។ ការអនុវត្តចំណាត់​ការ​បែបនេះនឹងតម្រូវឲ្យ​មានការយល់ព្រមពីរដ្ឋសមាជិកចំនួន ២៧ របស់ប្លុកនេះ​។ អ្នកនាំពាក្យម្នាក់មកពីគណៈកម្មការ មិនបានឆ្លើយតបទៅនឹងសំណើសុំការអត្ថាធិប្បាយឡើយ​។

គួរបញ្ជាក់ថា ក្រុមហ៊ុន Yangjie Electronic ត្រូវបានរួមបញ្ចូលនៅក្នុងកញ្ចប់ទណ្ឌកម្មលើកទី២០​ របស់ EU ដែលបានចុះបញ្ជីអង្គភាពមានមូលដ្ឋាននៅប្រទេសចិន ដែលប្លុកនេះ បញ្ជាក់​​ថា បានផ្តល់ប្រព័ន្ធទំនិញ​ប្រើប្រាស់បាន​ទាំង​ស៊ីវិល និង​យោធា ឬអាវុធដល់ប្រទេសរុស្ស៊ី។

ក្រុមហ៊ុនផលិត​បន្ទះ​ចិននេះ​ ត្រូវបានដាក់ទណ្ឌកម្មនៅក្នុងខែមេសា បន្ទាប់ពី​ការដឹកជញ្ជូនបច្ចេកវិទ្យារាប់សិបរបស់ខ្លួន ត្រូវបានចោទប្រកាន់ថា បានទៅដល់ប្រទេសរុស្ស៊ី ហើយផលិតផលរបស់ខ្លួន ត្រូវបានរកឃើញនៅក្នុងយាន​ដ្រូន​ និងគ្រាប់បែកមាន​ប្រព័ន្ធ​នាំ​ផ្លូវដែលប្រើប្រឆាំងនឹងអ៊ុយក្រែន។

ក្រុមហ៊ុនផលិតរថយន្តអឺរ៉ុបបានបញ្ចុះបញ្ចូល​ឲ្យ​ EU ពន្យារពេលការហាមឃាត់នេះ ដោយបញ្ជាក់​ថា ពួកគេមិនមានពេលវេលា ដើម្បីធ្វើពិពិធកម្មខ្សែច្រវាក់​ផ្គត់ផ្គង់របស់ពួកគេទេ ហើយវិធានការនេះ នឹងបណ្តាលឲ្យ​អស់​​ស្តុក ក្នុងរយៈពេលប៉ុន្មានសប្តាហ៍។​ នេះបើយោងតាមប្រភពដែលបាននិយាយក្នុងលក្ខខណ្ឌមិនបញ្ចេញឈ្មោះ៕