មន្ត្រីរុស្ស៊ី នៅ​ថ្ងៃសុក្រ (ទី២២ ខែឧសភា ឆ្នាំ២០២៦) នេះ បាន​ប្រាប់​ឲ្យ​ដឹង​ថា យ៉ាងហោចណាស់មនុស្ស ៤នាក់បានបាត់បង់ជីវិត​ ហើយ​កុមារ ៣៥នាក់រងរបួស អំឡុង​ការវាយប្រហារដោយយានដ្រូន​របស់អ៊ុយក្រែន នាពេល​យប់ លើអន្តេវាសិកដ្ឋាន​មួយកន្លែង ក្នុងទីក្រុងដែលគ្រប់គ្រងដោយរុស្ស៊ី គឺ Luhansk នៅភាគខាងកើតនៃ​ប្រទេស​អ៊ុយក្រែន។

ទីភ្នាក់ងារសារព័ត៌មាន​ Reuters មិនអាចផ្ទៀងផ្ទាត់ដោយឯករាជ្យភ្លាមៗបាន​ឡើយ​នូវអ្វីដែលបានកើតឡើង ហើយក៏​មិនមានការអត្ថាធិប្បាយភ្លាមៗនោះដែរ​ពីអ៊ុយក្រែនដែលកំពុងព្យាយាម​ប្រយុទ្ធ ដើម្បី​យក​ទីក្រុង Luhansk វិញ​ ជាតំបន់មួយ ក្នុងចំណោមតំបន់ទាំង ៤ ដែលរុស្ស៊ីបានអះអាងជាឯកតោភាគីថា ជារបស់ខ្លួន ក្នុងឆ្នាំ២០២២ ជា​ចំណាត់​ដែលទីក្រុងគីវបានបញ្ជាក់​ថា ជាការរឹបអូសកាន់កាប់​ដែន​ដីដោយ​​ខុសច្បាប់។

ស្នងការសិទ្ធិមនុស្សរបស់រុស្ស៊ី លោកស្រី Yana Lantratova បាននិយាយថា ក្មេងជំទង់ ៨៦នាក់ ដែលមានអាយុចន្លោះពី ១៤ ទៅ ១៨ឆ្នាំ បានសម្រាក​នៅក្នុងមហាវិទ្យាល័យ Starobilsk របស់​សាកលវិទ្យាល័យគរុកោសល្យ Luhansk នៅពេលដែលយានដ្រូន​របស់អ៊ុយក្រែនបានវាយប្រហារសាលានោះ​។

លោកស្រី​ Lantratova បានឲ្យដឹង​នៅក្នុងសេចក្តីថ្លែងការណ៍មួយថា៖ «កងកម្លាំងប្រដាប់អាវុធអ៊ុយក្រែនបានធ្វើការវាយប្រហារ ដោយ​កំណត់​គោល​ដៅ​លើកុមារដែលកំពុងដេកលក់​»។

រូបថត និងវីដេអូដែលចេញផ្សាយដោយអាជ្ញាធររុស្ស៊ី បានបង្ហាញក្រុមអ្នកជួយសង្គ្រោះកំពុងសែងបុរសម្នាក់ចេញពីកន្លែង​គំនរបាក់បែក អគាររង​ខូចខាតយ៉ាងធ្ងន់ធ្ងរ ដោយ​មាន​អគារមួយ ក្នុងចំណោមអគារទាំងនោះ ហាក់ដូចជាបានដួលរលំដោយផ្នែក ហើយភ្លើងនៅតែបន្ត​ឆាប​ឆេះ៕