ក្រសួងការបរទេសសហរដ្ឋអាមេរិក កាលពី​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) បានឲ្យ​ដឹង​ថា ខ្លួន បានយល់​ព្រម​ដល់​លទ្ធភាព​​លក់ឲ្យ​អ៊ុយ​ក្រែន​នូវឧបករណ៍​ជួយ​គាំទ្រ​ដល់​​ប្រព័ន្ធមីស៊ីល Hawk ដែលអាចមានតម្លៃ ១០៨,១លានដុល្លារ ទៅឲ្យ​អ៊ុយក្រែន។

យោងតាមសេចក្តីប្រកាសរបស់សភា បាន​ឲ្យ​ដឹង​ថា ប្រទេស​អ៊ុយក្រែនបានស្នើរ៉ឺម៉កដំឡើងបង្គោល ការកែសម្រួល​សំខាន់ៗ និងការគាំទ្រការ​ថែទាំ គ្រឿងបន្លាស់ គ្រឿងប្រើប្រាស់ គ្រឿងបន្លាស់​បន្ទាប់បន្សំ​ ការគាំទ្រ​ដល់​ជួសជុល និងយក​មកប្រើប្រាស់​វិញ ក៏ដូចជាសេវាកម្មវិស្វកម្ម បច្ចេកទេស និងភស្តុភារពីរដ្ឋាភិបាលសហរដ្ឋអាមេរិក និងអ្នកម៉ៅការ សម្រាប់ប្រព័ន្ធមីស៊ីល FrankenSAM HAWK។

ក្រសួងការបរទេសបានឲ្យ​ដឹង​ថា ការលក់ដែលត្រូវ​បានស្នើឡើងនេះ គាំទ្រដល់គោលនយោបាយការបរទេស និងគោលបំណងសន្តិសុខជាតិរបស់សហរដ្ឋអាមេរិក ដោយធ្វើ​ឲ្យ​សន្តិសុខរបស់អ៊ុយក្រែនប្រសើរ​ឡើង​ ដែលខ្លួនបានពិពណ៌នាថា ជាដៃគូដែលរួមចំណែកដល់ស្ថិរភាពនយោបាយ និងសេដ្ឋកិច្ច នៅអឺរ៉ុប។

ស្ថាប័ននេះ​បានបន្ត​​ថា កញ្ចប់នេះនឹងបង្កើនសមត្ថភាពរបស់អ៊ុយក្រែន ក្នុងការទប់ទល់នឹងការគំរាមកំហែងទាំង​ពេល​បច្ចុប្បន្ន និងអនាគត ដោយពង្រឹងសមត្ថភាពការពារដែនអាកាសរួមបញ្ចូលគ្នារបស់ខ្លួន សម្រាប់បេសកកម្មការពារខ្លួន និងសន្តិសុខក្នុងតំបន់។

ក្រសួងបានបន្ថែមថា អ៊ុយក្រែននឹងមិនពិបាកយក​​ឧបករណ៍ និងសេវាកម្មទាំង​នេះ​ទៅប្រើប្រាស់​ក្នុងកងកម្លាំងប្រដាប់អាវុធរបស់ខ្លួនឡើយ​ ហើយការលក់នេះនឹងមិនផ្លាស់ប្តូរតុល្យភាពយោធាជាមូលដ្ឋាន នៅក្នុងតំបន់នោះទេ។ ក្រសួងការបរទេសបានសង្កត់ធ្ងន់​ថា នឹងមិនមានផលប៉ះពាល់ជា​អវិជ្ជមាន ជុំវិញ​ការត្រៀមខ្លួនការពារជាតិរបស់សហរដ្ឋអាមេរិក ដោយសារតែការលក់នេះ​ឡើយ​៕