អ្នកវិភាគនយោបាយមួយរូបនិយាយប្រាប់ទីភ្នាក់ងារព័ត៌មានរ៉យទ័រនាថ្ងៃសុក្រនេះថា លទ្ធភាពនៃការជជែកគ្នាតាមទូរស័ព្ទដ៏មានសក្តានុពលរវាងប្រធានាធិបតីសហរដ្ឋអាមេរិកលោក Donald Trump និងប្រធានអាជ្ញាធរកោះតៃវ៉ាន់លោក Lai Ching-te អាចនឹងត្រូវប្រើប្រាស់ធ្វើជាសន្លឹកបៀយុទ្ធសាស្ត្រដោយប្រធានាធិបតីសហរដ្ឋអាមេរិក ដើម្បីដាក់សម្ពាធចិនឲ្យវិលត្រឡប់មករកតុចរចាពាណិជ្ជកម្មវិញ ហើយនិងបង្ខំឲ្យភាគទាំងអស់នៅក្នុងត្រីកោណ សហរដ្ឋអាមេរិក-ចិន-កោះតៃវ៉ាន់ បញ្ជាក់គោលជំហររបស់ពួកគេ បើទោះបីជាវាប្រហែលមិនផ្លាស់ប្តូរស្ថានភាពបច្ចុប្បន្នភ្លាមៗក៏ដោយ ។

លោក Hung Yao-nan គឺជាប្រធានមជ្ឈមណ្ឌលសិក្សាទំនាក់ទំនងឆ្លងច្រកសមុទ្រនៅសាកលវិទ្យាល័យ Tamkang និយាយថា ពីព្រោះថាសម្រាប់ទីក្រុងប៉េកាំងដែលជំទាស់ការលក់អាវុធសហរដ្ឋអាមេរិកឲ្យទៅកោះតៃវ៉ាន់ ពួកគេចង់ការពារអន្តរកម្មរវាងក្រុមមន្រ្តីសហដ្ឋអាមេរិក និងកោះតៃវ៉ាន់ផងដែរ ។

លោកបន្តថា ក្រៅពីនោះ ទីក្រុងប៉េកាំងមិនយល់ឃើញថា កោះតៃវ៉ាន់គឺជាប្រទេសនោះទេ ដូច្នេះហើយ ពួកគេរារាំងអន្តរកម្មរវាងសហរដ្ឋអាមេរិក និងកោះតៃវ៉ាន់ ជាពិសេសនៅកម្រិតខ្ពស់ដូចជាការជជែកគ្នាកម្រិតប្រធានាធិបតី ។

សូមបញ្ជាក់ថា កោះតៃវ៉ាន់ដែលចិនចាត់ទុកថាជាខេត្តផ្តាច់ខ្លួនរបស់ពួកគេនោះ បាននឹងកំពុងរង់ចាំសហរដ្ឋអាមេរិកអនុម័តកញ្ចប់លក់អាវុធថ្មីដែលទីភ្នាក់ងាររ៉យទ័ររាយការណ៍ថា វាអាចមានតម្លៃរហូតដល់ ១៤ពាន់លានដុល្លារ ។

ទោះបីជាយ៉ាងណាក៏ដោយ លោក Trump និយាយបន្ទាប់ពីជំនួបកំពូលជាមួយប្រធានាធិបតីចិនលោក Xi Jinping នៅទីក្រុងប៉េកាំងកាលពីសប្តាហ៍មុនថា លោកនៅមិនទាន់សម្រេចចិត្តថាតើគួរអនុម័តកញ្ចប់លក់អាវុធមួយនេះ ឬយ៉ាងណានោះទេ ៕