រដ្ឋមន្រ្តីការបរទេសអាល្លឺម៉ង់លោក Johann Wadephul និយាយនៅថ្ងៃសុក្រនេះថា រដ្ឋាភិបាលរបស់លោកនឹងចំណាយថវិកាជាង ៤ភាគរយនៃផលិតផលក្នុងស្រុកសរុបលើវិស័យការពារជាតិ ក្នុងឆ្នាំ ២០២៦នេះ ។

មុនជំនួបអង្គការណាតូនៅទីក្រុង Helsingborg លោក Wadephul និយាយផងដែរថា ស៊ុយអែត និងអាល្លឺម៉ង់ ស្ថិតលើផ្លូវឆ្ពោះទៅរកការចំណាយ ៥ភាគរយ សម្រាប់វិស័យការពារជាតិ ។

លោកថា ការផ្តោតសំខាន់នៅពេលនេះ គឺផ្លូវឆ្ពោះទៅរកក្របខណ្ឌយុទ្ធសាស្រ្ត NATO 3.0 ជាមួយគំរូចែករំលែកបន្ទុកថ្មី ។ សម្ព័ន្ធមិត្តមួយនេះ មានទំនួលខុសត្រូវអស្ចារ្យជាងមុនរបស់អឺរ៉ុប និងសមត្ថភាពច្រើនជាងមុនរបស់អឺរ៉ុប ។

ពាក់ព័ន្ធនឹងផែនការសហរដ្ឋអាមេរិក ក្នុងការដកទាហាន ៥ពាន់នាក់ចេញពីអាល្លឺម៉ង់ លោក Wadephul និយាយថា គេតែងតែរំពឹងថា សហរដ្ឋអាមេរិកនឹងបំលាស់ទីទាហានរបស់ពួកគេ ហើយលោកក៏ស្វាគមន៍ផងដែរការសម្រេចចិត្តរបស់សហរដ្ឋអាមេរិក ក្នុងការដាក់ពង្រាយទាហានបន្ថែមទៀតទៅកាន់ប្រទេសប៉ូឡូញ ។

គួរឲ្យដឹងថា កាលពីថ្ងៃព្រហស្បតិ៍ម្សិលមិញ ប្រធានាធិបតីសហរដ្ឋអាមេរិកលោក Donald Trump បាននិយាយថា សហរដ្ឋអាមេរិក នឹងបញ្ជូនកងទ័ពបន្ថែមចំនួន ៥ពាន់នាក់ ទៅកាន់ប្រទេសប៉ូឡូញ ដែលបង្កឲ្យមានការភាន់ច្រឡំ បន្ទាប់ពីសេចក្តីថ្លែងការណ៍ផ្លាស់ប្តូរជាច្រើនសប្តាហ៍របស់លោក និងរដ្ឋបាលរបស់លោកអំពីការកាត់បន្ថយ គឺមិនមែនបង្កើនវត្តមានយោធាអាមេរិកនៅអឺរ៉ុបនោះទេ ។

ចំណាត់ការនេះ ត្រូវបានស្វាគមន៍ដោយប្រមុខអង្គការណាតូលោក Mark Rutte ដោយរូបលោកនិយាយថា និន្នាការនេះនៅតែងាកទៅរកអឺរ៉ុបដែលរឹងមាំជាងមុន ដោយមិនសូវពឹងផ្អែកលើសហរដ្ឋអាមេរិកសម្រាប់វិស័យការពារជាតិរបស់ខ្លួន ៕