សកម្មជនម្នាក់ដែលបានចូលរួមកងនាវាដឹកជំនួយហ្កាហ្សា Global Sumud បង្ហាញខ្នង និងដៃរបស់លោក មានស្នាមជាំគ្រប់កន្លែង ក្រោយធ្វើដំណើរទៅដល់ទីក្រុង Istanbul ប្រទេសទួរគី បន្ទាប់ពីអាជ្ញាធរអ៊ីស្រាអែលស្កាត់ចាប់កងនាវារបស់ពួកគេនៅភាគខាងកើតសមុទ្រមេឌីទែរ៉ាណេ ។

លោក Adrien Jouan គឺជាសកម្មជនមួយរូប និយាយថា ឆ្អឹងជំនីរបស់លោកមានការឈឺចាប់ខ្លាំងណាស់ ហើយអ្នកផ្សេងទៀតដែលមិនមែនជាជនជាតិអឺរ៉ុបស្បែកស. ត្រូវបានគេវាយដុំយ៉ាងធ្ងន់ធ្ងរផងដែរ ។

កាលពីថ្ងៃពុធ នគរបាលអ៊ីស្រាអែលបានបង្ខំសកម្មជនដែលនៅលើកងនាវាដឹកជំនួយហ្កាហ្សា ឲ្យលុតជង្គង់លើដីជាជួរដោយដៃរបស់ពួកគេត្រូវបានចង និងពាត់ក្រោយខ្នង ជាហេតុធ្វើឲ្យមានការរិះគន់យ៉ាងខ្លាំងពីក្រុមមេដឹកនាំបរទេស ហើយសូម្បីតែអ្នកនៅក្នុងជួររដ្ឋាភិបាលខ្លួនឯងរបស់អ៊ីស្រាអែល ។

អ៊ីស្រាអែលបាននិរទេសខ្លួនសកម្មជនបរទេសទាំងអស់ដែលត្រូវបានចាប់ខ្លួនដោយកងកម្លំាងអ៊ីស្រាអែល ក្រោយពេលពួកគេវាយប្រហារកងនាវាដឹកជំនួយហ្កាហ្សា កាលពីដើមសប្តាហ៍នេះ ។ ការនិរទេសខ្លួននេះដែរ បានកើតឡើង បន្ទាប់ពីការតវ៉ាសកល ចំពោះទង្វើរបស់កងកម្លាំងអ៊ីស្រាអែលលើក្រុមសកម្មជន អំឡុងពេលជាប់ឃុំ ។

អ្នកនាំពាក្យក្រសួងការបរទេសអ៊ីស្រាអែលលោក Oren Marmorstein និយាយកាលពីថ្ងៃព្រហស្បតិ៍នេះថា សកម្មជនទាំងអស់មកពីកងនាវាដឹកជំនួយហ្កាហ្សា PR ត្រូវបាននិរទេសខ្លួនចេញពីអ៊ីស្រាអែល ៕