នៅទីក្រុងភាគខាងកើត Bunia របស់សាធារណរដ្ឋប្រជាធិបតេយ្យកុងហ្គោ ក្រុមការងារសុខភាព ពាក់ឧបករណ៍ការពារ ខណៈជំងឺអេបូឡា បង្កការព្រួយបារម្ភ និងព័ត៌មានមិនពិត ធ្វើឲ្យសាយភាយពាក្យចចាមអារ៉ាមជាច្រើន ។

កម្មករខ្លះទៀតនាំគ្នាបាញ់ថ្នាំសម្លាប់មេរោគដោយខ្លួនឯង ដើម្បីការពារជំងឺអេបូឡា ពីការរីករាលដាលឆ្លងបន្ថែមទៀត ប៉ុន្តែមានរឿងមួយដែលឧបករណ៍ទាំងនេះ មិនអាចការពារពួកគេបាន គឺព័ត៌មានមិនពិត និងពាក្យចចាមអារ៉ាម ។

ក្រុមអ្នកជំនាញសុខភាពព្រមានថា ពាក្យចចាមអារ៉ាមទាំងនេះ នៅតែជាឧបសគ្គធំ ក្នុងការទប់ស្កាត់ការរីករាលដាលឆ្លងជំងឺអេបូឡា ។ ការរីករាលដាលឆ្លងជំងឺមួយនេះ កំពុងកើតឡើងនៅតំបន់ភាគខាងកើតកុងហ្គោ ជាទីដែលការរីករាលដាលឆ្លងលើកមុន បង្កឲ្យមានក្តីបារម្ភ និងការប្រឆាំង ។

លោក Luc Malembe គឺជាពលរដ្ឋមួយរូបរស់នៅក្នុងទីក្រុង Bunia បានដាក់ការស្តីបន្ទោសលើការយល់ដឹងខ្សោយរបស់សាធារណជន សម្រាប់ការរីករាលដាលការភ័យខ្លាច និងពាក្យចចាមអារ៉ាម ។

លោកថា នៅពេលនេះ ពួកយើងត្រូវបានគេនិយាយប្រាប់ថា មានក្តារមឈូសដ៏អាថ៌កំបាំងមួយដែលបានមកដល់នៅពេលយប់ ហើយនេះគឺជាអ្វីដែលកំពុងសម្លាប់មនុស្ស ។

លោកបន្តថា សូម្បីតែនៅតាមសង្កាត់មួយចំនួនក្នុងទីក្រុង Mwangalou ចាប់ផ្តើមលែងមានមនុស្សរស់នៅដែរ ពីព្រោះថា មនុស្សកំពុងស្លាប់ ហើយគ្មាននរណាម្នាក់អាចនិយាយប្រាប់អ្វីបានកើតឡើងនោះទេ ។ ដូច្នេះហើយ នេះគឺជាកង្វះខាតការទំនាក់ទំនង គ្មានការទំនាក់ទំនងពីអាជ្ញាធរសុខភាពនៅក្នុងខេត្ត ធ្វើឲ្យពាក្យចាចាមចេះតែរីករាលដាលកាន់តែខ្លាំង ។

ក្រសួងសុខភាពពិភពលោក(WHO) និយាយថា មនុស្សរាប់រយនាក់ បានស្លាប់ និងឆ្លងជំងឺអេបូឡា នៅទូទាំងប្រទេសកុងហ្គោ និងប្រទេសជិតខាងអ៊ូហ្គង់ដា ។

ក្រសួងសុខាភិបាលកុងហ្គោ និយាយកាលពីថ្ងៃព្រហស្បតិ៍ថា ការរីករាលដាលឆ្លងជំងឺអេបូឡា សង្ស័យ បានសម្លាប់មនុស្ស ១៦០នាក់ ក្នុងចំណោមករណីសង្ស័យ ៦៧០នាក់ ៕