នាថ្ងៃសុក្រ (ទី២២ ខែឧសភា ឆ្នាំ២០២៦) នេះ ប្រទេសចិនបានដាក់ចេញនូវការគ្រប់គ្រង លើ​ការនាំចេញសារធាតុគីមីផ្សំ​ថ្នាំ​​ចំនួន ៣មុខ ដែលដឹកជញ្ជូនទៅកាន់អាមេរិកខាងជើង ខណៈដែលទីក្រុងវ៉ាស៊ីនតោន និងប៉េកាំង បង្កើនកិច្ចសហប្រតិបត្តិការ ប្រឆាំងនឹងការជួញដូរគ្រឿងញៀន បន្ទាប់ពីមាន​នូវ​ដំណើរទស្សនកិច្ចរបស់មេដឹកនាំសហរដ្ឋអាមេរិក លោក Donald Trump នៅ​ទីក្រុងប៉េកាំង។

នៅក្នុងសេចក្តីថ្លែងការណ៍មួយ ក្រសួងពាណិជ្ជកម្មចិនបានសរសេរថា សារធាតុគីមីទាំងនេះ ឥឡូវនេះ នឹងតម្រូវឲ្យ​មានអាជ្ញាប័ណ្ណពីភ្នាក់ងាររដ្ឋាភិបាល ដើម្បីនាំចេញទៅកាន់សហរដ្ឋអាមេរិក កាណាដា និងម៉ិកស៊ិក​​។

ទីក្រុងវ៉ាស៊ីនតោនបានបន្ត​រក្សាអត្រាពន្ធ ១០​ភាគរយ លើទំនិញចិន ជា​ការឆ្លើយ​តប​ ចំពោះប្រទេស​​ចិន ដែលត្រូវបានចោទប្រកាន់ថា មាន​តួនាទីក្នុង​ខ្សែច្រវាក់ផ្គត់ផ្គង់សារធាតុហ្វង់តានីល។

ការរឹតបន្តឹងថ្មីនេះបានកើតឡើង មួយសប្តាហ៍បន្ទាប់ពីប្រធានាធិបតីចិន លោក Xi Jinping និងលោក Trump បានស្វែងរកស្ថិរភាព នៅក្នុង​ទំនាក់ទំនងដ៏ច្របូកច្របល់ អំឡុងជំនួបពិភាក្សា​ នៅទីក្រុងប៉េកាំង។

ការប្រយុទ្ធប្រឆាំងនឹងការរត់ពន្ធគ្រឿងញៀន បានលេចឡើង​ជាវិស័យសហប្រតិបត្តិការ រវាងមហាអំណាចដែល​ជា​គូប្រជែងនឹង​គ្នាទាំង២៕