រដ្ឋមន្រ្តីការបរទេសអេស្តូនីលោក Margus Tsahkna និយាយប្រាប់ក្រុមអ្នកសារព័ត៌មាននាថ្ងៃសុក្រនេះ មុនជំនួបអង្គការណាតូនៅប្រទេសស៊ុយអែតថា វាអាស្រ័យលើសហរដ្ឋអាមេរិកខ្លួនឯងទេដែលត្រូវសម្រេចចិត្តថាតើ ចំនួនទាហានប៉ុន្មាននាក់ដែលពួកគេមាននៅអឺរ៉ុប ។

ជំនួបថ្នាក់រដ្ឋមន្រ្តីការបរទេសអង្គការណាតូរយៈពេល ២ថ្ងៃ បានចាប់ផ្តើមកាលពីល្ងាចថ្ងៃព្រហស្បតិ៍ ហើយវាគឺជាជំនួបថ្នាក់រដ្ឋមន្រ្តីការបរទេសអង្គការណាតូលើកដំបូងដែលធ្វើម្ចាស់ផ្ទះដោយប្រទេសស៊ុយអែត ចាប់តាំងពីពួកគេបានចូលរួមជាមួយអង្គការណាតូ កាលពីឆ្នាំ ២០២៤ ។

លោក Tsahkna និយាយថា លោកអាចធានាបានក្នុងនាមជាសមាជិកមួយក្នុងចំណោមសមាជិកមានព្រំដែនភាគខាងកើតរបស់អង្គការណាតូថា អង្គការណាតូ ធ្វើបានល្អ ពីព្រោះថា បើសិនជាអ្នកមើលអំឡុងរយៈពេល ២សប្តាហ៍ចុងក្រោយនេះ ពួកយើងមើលឃើញយានដ្រូនកាន់តែច្រើនចូលទឹកដីរបស់ពួកយើង គឺយានដ្រូនអ៊ុយក្រែន ប៉ុន្តែអ្នកដែលត្រូវទទួលខុសត្រូវគឺរុស្ស៊ី ពីព្រោះថា រុស្ស៊ីជាអ្នកបង្កសង្រ្គាមជាមួយអ៊ុយក្រែន ហើយរុស្សីគឺជាអ្នកនាំយានដ្រូនទាំងនេះ មកកាន់ទឹកដីណាតូ ។

គួរឲ្យដឹងថា កាលពីថ្ងៃព្រហស្បតិ៍ម្សិលមិញ ប្រធានាធិបតីសហរដ្ឋអាមេរិកលោក Donald Trump បាននិយាយថា សហរដ្ឋអាមេរិក នឹងបញ្ជូនកងទ័ពបន្ថែមចំនួន ៥ពាន់នាក់ ទៅកាន់ប្រទេសប៉ូឡូញ ដែលបង្កឲ្យមានការភាន់ច្រឡំ បន្ទាប់ពីសេចក្តីថ្លែងការណ៍ផ្លាស់ប្តូរជាច្រើនសប្តាហ៍របស់លោក និងរដ្ឋបាលរបស់លោកអំពីការកាត់បន្ថយ គឺមិនមែនបង្កើនវត្តមានយោធាអាមេរិកនៅអឺរ៉ុបនោះទេ ។

ចំណាត់ការនេះ ត្រូវបានស្វាគមន៍ដោយប្រមុខអង្គការណាតូលោក Mark Rutte ដោយរូបលោកនិយាយថា និន្នាការនេះនៅតែងាកទៅរកអឺរ៉ុបដែលរឹងមាំជាងមុន ដោយមិនសូវពឹងផ្អែកលើសហរដ្ឋអាមេរិកសម្រាប់វិស័យការពារជាតិរបស់ខ្លួន ៕