ប្រជាជនគុយបារាប់ពាន់នាក់ នៅថ្ងៃសុក្រ (ទី២២ ខែឧសភា ឆ្នាំ២០២៦) នេះ បានប្រមូលផ្តុំគ្នានៅពី​មុខស្ថានទូតអាមេរិក ក្នុង​ទីក្រុងឡាហាវ៉ាន​ ដើម្បីតវ៉ាប្រឆាំងនឹងការសម្រេចរបស់សហរដ្ឋអាមេរិក ក្នុងការចោទប្រកាន់ជាផ្លូវ​ការ លើ​អតីតមេដឹកនាំ លោក Raul Castro ពីបទបាញ់ទម្លាក់យន្តហោះស៊ីវិល ២គ្រឿង កាលពី ៣០​ឆ្នាំមុន។

បាតុកម្មគាំទ្ររដ្ឋាភិបាលនេះ​ ដែលបានចាប់ផ្តើមភ្លាមៗក្រោយ​ថ្ងៃរះ នៅទីក្រុងឡាហាវ៉ាន​ បានកើតឡើងនៅពេលដែលមន្ត្រីគុយបា សប្តាហ៍នេះ បានប្រមូលផ្តុំគ្នានៅ​ជុំវិញអតីតប្រធានាធិបតី និងវីរបុរសបដិវត្តន៍របស់កោះនេះ។

ប្រទេស​គុយបា លើក​ឡើង​ថា ការចោទប្រកាន់លោក Castro ពីបទឃាតកម្ម កាល​ពី​ថ្ងៃពុធ គឺផ្អែកលើការចោទប្រកាន់ «មិនពិត» ដែលត្រូវបានរៀប​ចំ​ឡើងជាលេស ដើម្បីឈ្លានពានប្រទេសជាតិ ក្នុង​ពេលមានការជំរុញរបស់រដ្ឋបាលរបស់​លោកប្រធានាធិបតី​ Donald Trump ឲ្យ​ផ្តួលរំលំរដ្ឋាភិបាលរបស់កោះនេះ។

ប្រធានាធិបតីគុយបាលោក Miguel Diaz-Canel និងនាយករដ្ឋមន្ត្រី លោក​ Manuel Marrero បានចូលរួមក្នុង​ការជួបជុំនេះ ប៉ុន្តែលោក Castro វ័យ​ ៩៤ឆ្នាំ មិនមាន​វត្តមាន​ឡើយ​៕