ប្រទេស​ម៉ិកស៊ិក និងសហភាពអឺរ៉ុប (EU) នឹងចុះហត្ថលេខាលើកិច្ចព្រមព្រៀងពាណិជ្ជកម្មសេរីដែលជាប់គាំងជាយូរមកហើយ នៅថ្ងៃសុក្រ (ទី២២ ខែឧសភា ឆ្នាំ២០២៦) នេះ ខណៈដែលភាគីទាំង​២ ស្វែងរកការកាត់បន្ថយការពឹងផ្អែក លើសហរដ្ឋអាមេរិក និងការពារខ្លួនដោយផ្នែក ពីពន្ធរបស់ប្រធានាធិបតីអាមេរិក លោក​ Donald Trump។

ការ​ស្រុះ​ស្រួល​គ្នា​នេះ ដែលភាគី​ទាំង២ បានឈានដល់កិច្ចព្រមព្រៀង​យ៉ាង​ទូលំទូលាយនៅឆ្នាំ២០២៥ ប៉ុន្តែបានពន្យារពេលចុះហត្ថលេខា ពង្រីកកិច្ចព្រមព្រៀងពាណិជ្ជកម្មម៉ិកស៊ិក-EU ពីឆ្នាំ២០០០ ដែលគ្របដណ្តប់តែទំនិញឧស្សាហកម្មប៉ុណ្ណោះ។ កិច្ចព្រមព្រៀងថ្មីនេះ បន្ថែមសេវាកម្ម លទ្ធកម្ម​របស់រដ្ឋាភិបាល ពាណិជ្ជកម្មឌីជីថល ការវិនិយោគ និងផលិតផលកសិកម្ម។

ប្រធានាធិបតីម៉ិកស៊ិក លោកស្រី Claudia Sheinbaum ប្រធានគណៈកម្មការអឺរ៉ុប លោកស្រី Ursula von der Leyen និងប្រធានក្រុមប្រឹក្សាអឺរ៉ុប លោក Antonio Costa នឹងចុះហត្ថលេខាលើកិច្ចព្រមព្រៀងនេះនៅទីក្រុង Mexico ក្នុងកិច្ចប្រជុំកំពូលលើកដំបូងរបស់ពួកគេ ក្នុងរយៈពេលជាង ១ទសវត្សរ៍។

ប្រធានគោលនយោបាយការបរទេសរបស់ EU លោកស្រី​ Kaja Kallas បាននិយាយ​កាលពីថ្ងៃព្រហស្បតិ៍នៅទីក្រុង Mexico មុនពេលចុះហត្ថលេខាថា «កិច្ចប្រជុំកំពូលនេះ មាន​ន័យច្រើនជាង​​ពាណិជ្ជកម្ម។ វាគឺ​ជាសេចក្តីថ្លែងការណ៍ភូមិសាស្ត្រនយោបាយ»។

កិច្ច​ព្រម​ព្រៀង​នេះ បង្ហាញ​ថា ភាគីទាំង២ ចង់ធ្វើពិពិធកម្មការនាំចេញរបស់ពួកគេឲ្យ​ឆ្ងាយពីសហរដ្ឋអាមេរិក​៕