ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅ ថ្ងៃទី២៨ សីហានេះ បានអនុញ្ញាតឱ្យប្រតិភូវិនិយោគិនចិនដឹកនាំដោយ លោក លី សុងជាន ប្រធានគណៈប្រតិភូសហព័ន្ធពាណិជ្ជករចិនទាជីវ សកលលោក ចូលជួបសំដែងការគួរសមនិងពិភាក្សាការងារនៅវិមានសន្តិភាព។
ក្នុងជំនួបសំដែងការគួរសម និងពិភាក្សាការងារនេះ គណៈប្រតិភូ បានគោរពសុំស្វែងយល់ពីប្រមុខរាជរដ្ឋាភិបាលកម្ពុជា នូវឱកាសសម្រាប់ការវិនិយោគលើសក្ដានុពលដែលកម្ពុជាមាន ដើម្បីចូលរួមចំណែកក្នុងការវិនិយោគនៅកម្ពុជាបន្ថែមទៀត។
សូមបញ្ជាក់ថា គណៈប្រតិភូនេះ បានមកកម្ពុជាចូលរួម សន្និសីទសេដ្ឋកិច្ចប្រចាំឆ្នាំនៃសហព័ន្ធពាណិជ្ជករចិន ទាជីវ ដែលធ្វើឡើងនៅសាលាបុរីកោះពេជ្រ កាលពីថ្ងៃទី ២៦ ខែសីហាឆ្នាំ ២០១៨ ដើម្បីស្វែងរកការវិនិយោគលើវិស័យសក្ដានុពលផ្សេងៗ នៅកម្ពុជា។
ប្រតិភូសហព័ន្ធពាណិជ្ជករចិន ទាជីវសកលលោកគឺសុទ្ធសឹងតែជាពាណិជ្ជករឆ្នើមលើវិស័យអចលនទ្រព្យ ហិរញ្ញវត្ថុ កសិកម្ម ឧស្សាហកម្ម បច្ចេកវិទ្យាទំនើប វេជ្ជសាស្ត្រ ជីវៈបច្ចេកវិទ្យា ហើយសហព័ន្ធពាណិជ្ជករចិន ទាជីវនេះ ត្រូវបានទទួលស្គាល់ថា ជាអ្នកធ្វើជំនួញរកស៊ី ដ៏ពូកែនិងជោគជ័យនៅលើសាកលលោក៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
