​បាល់ទាត់៖ ​ការប្រកួត​ក្រប​ខណ្ឌ UEFA Europa League បាន​បញ្ចប់​វគ្គ ១៦​ក្រុម​ចុងក្រោយ​ហើយ​យប់មិញ​នេះ ​ដោយ​ក្រុម​អង់គ្លេស​ពីរ Manchester United និង Arsenal ឈានឡើង​វគ្គ ៨​ក្រុម​ចុង​ក្រោយ​ លើកលែងតែ Tottenham Hotspur ធ្លាក់​ត្រឹមនេះ​។

​​Spurs ដែល​បាន​យកឈ្នះ​ក្នុង​ទឹកដី​របស់ខ្លួន ២-០ លើ​ក្រុម​ភ្ញៀវ​ក្រូ​អាស៊ី Dinamo Zagreb នោះមិនមាន​ជោគវាសនា​ល្អ​ឡើយ ​នៅពេល​ត្រលប់​ទៅ​ទឹកដី​ក្រូ​អាស៊ី​វិញ​យប់មិញ​។ ​​Mislav Orsic ​គឺជា​តួអង្គ​សំខាន់​ក្នុងការ​ទំលាក់​ក្រុម​របស់លោក Jose Mourinho​ ក្រោយ​ខ្សែប្រយុទ្ធ​វ័យ ២៨ឆ្នាំ​រូបនេះ​ស៊ុត​បញ្ចូល​ទី ៣​គ្រាប់​ម្នាក់ឯង​ឲ្យ Dinamo Zagreb យកឈ្នះ​ជើង​ទី២ នេះ ៣-០ និង​សរុប​ទាំងពីរ​ជើង ៣-២​។

​​ងាក​មក​ក្រុម​អង់គ្លេស​ពីរ​ទៀត Manchester United បាន​បន្តដំណើរ​ឡើង​ជុំ​បន្ត​ ក្រោយ​យកឈ្នះ​នៅ​ទឹកដី AC Milan ១-០​។ ​​បន្ទាប់ពី​ស្មើគ្នា ១-១ នៅ​ទឹកដី Old Trafford ក្រុម​របស់លោក Ole Gunnar Solskjaer ​មកកាន់​ទឹកដី​អ៊ីតាលី​វិញ ជាមួយនឹង​ជ័យជំនះ ១គ្រាប់​សំរេចបាន​ដោយ​ខ្សែបំរើ​បារាំង Paul Pogba ​ដែល​បង្ហាញខ្លួន​លើកដំបូង​នៅ Europa League រដូវ​កាល​នេះ បន្ទាប់ពី​របួស​ភ្លៅ​ដែល​ធ្វើ​ឲ្យគេ​អវត្តមាន​តាំងពី​ថ្ងៃទី៦ ខែកុម្ភៈ​។​

​​ចំណែក​ក្រុម​កាំភ្លើង​ធំ Arsenal ជើង​ទី២ នេះ​បែ​ជា​ចាញ់​ក្រុម​ភ្ញៀវ​ក្រិ​ក Olympiakos ១-០ តែ​មិន​ថ្វី​ទេក្រុម​របស់លោក Mikel Arteta ​បាន​ឡើង​ជុំ​បន្ត​ក្រោយ​ឈ្នះ​សរុប​ទាំងពីរ​ជើង ៣-២​។ ​ការចាប់​ឆ្នោត​បែងចែក​គូ​នៅ​វគ្គ ៨ក្រុម​ចុងក្រោយ​នឹងធ្វើ​ឡើង​ថ្ងៃ​សុក្រ​នេះ​ទាំង Champions League និង Europa League៕

​អត្ថបទ​៖​នាង សុភា​វុ​ធ