សហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម (IFRC) បានឲ្យ​ដឹង​នៅ​ថ្ងៃសុក្រ (ទី២២ ខែឧសភា ឆ្នាំ២០២៦) នេះ​ថា អ្នកស្ម័គ្រចិត្តកំពុងចេញ​ពី​ផ្ទះ​មួយ​ទៅផ្ទះមួយ ដើម្បីប្រយុទ្ធប្រឆាំងនឹងព័ត៌មានមិនពិត អំពីជំងឺ Ebola ក្នុងតំបន់ដែលស្ថិតនៅចំកណ្តាលនៃការផ្ទុះឡើង នៅ​សាធារណរដ្ឋប្រជាធិបតេយ្យកុងហ្គោ។

វីរុស​ជំងឺ​ Ebola ប្រភេទ Bundibugyo ដែលមិនមានវ៉ាក់សាំងការ​ពារ​ ឬការព្យាបាលដែលត្រូវបានអនុម័ត ត្រូវបានប្រកាសថា ជាគ្រា​អាសន្ននៃការក្ដី​បារម្ភជា​អន្តរជាតិ ដោយអង្គការសុខភាពពិភពលោក (WHO) កាលពីថ្ងៃអាទិត្យចុងសប្ដាហ៍កន្លង​មក​។

IFRC បានប្រាប់​ថា ខ្លួនកំពុងធ្វើការជាមួយសហគមន៍ នៅតំបន់ Mongbwalu ដែលជាចំណុចកណ្តាលនៃការផ្ទុះឡើងនូវ​ជំងឺនេះ ដើម្បីពន្យល់ថា តើ​មនុស្សអាចការពារខ្លួនយ៉ាង​ដូចម្ដេច និងថា តើ​ពេលណាត្រូវស្វែងរកការថែទាំ។

លោកស្រី Gabriela Arenas អ្នកសម្របសម្រួលប្រតិបត្តិការប្រចាំ​តំបន់ សម្រាប់តំបន់អាហ្វ្រិករបស់​ IFRC បានប្រាប់អ្នកសារ​ព័ត៌មានតាមរយៈតំណភ្ជាប់វីដេអូពីទីក្រុង Nairobi ថា៖ «ប្រតិកម្មរបស់សហគមន៍នៅតែមានភាព​ច្របូកច្របល់​។ សម្រាប់មនុស្សមួយចំនួន ការផ្ទុះឡើងនូវ​ជំងឺនេះ គឺពិតប្រាកដណាស់​ ហើយពួកគេកំពុងយកព័ត៌មាន អំពីវិធី​ការពារខ្លួន​។ សម្រាប់អ្នកផ្សេងទៀត នៅតែមានការសង្ស័យ ហើយ​មាន​ព័ត៌មានមិនពិតដែលអះអាងថា ជំងឺ Ebola ត្រូវបានប្រឌិតឡើង»។

គួរ​បញ្ជាក់​ថា ភាពតានតឹងបានលេចឡើងនៅក្នុង​សហគមន៍​​។ ក្រុមអ្នកតវ៉ាបានដុតតង់ សម្រាប់អ្នកជំងឺ Ebola បន្ទាប់ពីអាជ្ញាធរកុងហ្គោ បានបដិសេធមិនប្រគល់​សាកសពរបស់កីឡាករបាល់ទាត់នៅមូលដ្ឋាន​ជាទីស្រឡាញ់ម្នាក់ ដែលត្រូវបាន​សង្ស័យថា បានស្លាប់ក្នុងអំឡុង​ពេល​ផ្ទុះជំងឺនេះឡើង​។ ពួកគេចង់បញ្ចុះសពកីឡាករ​ដោយខ្លួនឯង ហើយក្រុមគ្រួសាររបស់គេ បានជំទាស់ថា ជំងឺ Ebola មិន​មែន​ជាដើម​ហេតុ​នៃ​ការស្លាប់​នេះ​ឡើយ​។

លោកស្រី​ Arenas បាននិយាយថា អ្វី​ដែល​បាន​កើត​ឡើង​នេះ បង្ហាញថា តើ​ហេតុ​អ្វីការកសាងទំនុកចិត្តនៅក្នុងសហគមន៍ មានសារៈសំខាន់ខ្លាំង​ម៉្លេះ​៕