នាយករដ្ឋមន្ត្រី​ លោក​ Rob Jetten បាននិយាយ​នៅ​ថ្ងៃសុក្រ (ទី២២ ខែឧសភា ឆ្នាំ២០២៦) នេះថា រដ្ឋាភិបាលហូឡង់ បានយល់ព្រមដាក់បម្រាម លើការនាំចូលទំនិញដែលផលិតនៅក្នុងតំបន់​​តាំងទីលំនៅរបស់ជនជាតិជ្វីហ្វ នៅក្នុងដែន​ដីប៉ាឡេស្ទីនដែលត្រូវបាន​កាន់កាប់ដោយអ៊ីស្រាអែល។

លោក Jetten បាននិយាយថា ការហាមឃាត់នេះ ស្មើនឹង​ការ​ការពារមិន​ឲ្យ​មាន​ «ការចូលរួមចំណែកណាមួយ តាមរយៈសកម្មភាពសេដ្ឋកិច្ចដោយប្រទេសហូឡង់ ចំពោះការកាន់កាប់ដោយ​ខុសច្បាប់នេះ​»។

រដ្ឋាភិបាលហូឡង់មុន កាលពីឆ្នាំកន្លង​ទៅ បានបញ្ជាក់​ថា ខ្លួនកំពុងរៀបចំផែនការហាមឃាត់នេះ ដែលឥឡូវនេះ ត្រូវបានគេរំពឹងថា នឹងចូលជាធរមាននៅក្នុងឆមាសទី២ នៃឆ្នាំនេះ។ ប្រទេសហូឡង់គឺជាអ្នកទិញទំនិញអ៊ីស្រាអែលឈានមុខគេ លើពិភពលោក ប៉ុន្តែរដ្ឋាភិបាលមិនដែលបានបង្ហាញនោះឡើយ​ថា តើបរិមាណទំនិញប៉ុន្មាន ត្រូវបាននាំចូលពីកន្លែង​តាំងទីលំនៅរបស់ជនជាតិជ្វីហ្វ​ នាពេលបច្ចុប្បន្ននេះ។

គួរ​បញ្ជាក់​ថា មហាអំណាចពិភពលោកភាគច្រើន ចាត់ទុកការតាំងទីលំនៅរបស់អ៊ីស្រាអែល នៅលើដីដែលខ្លួនបានកាន់កាប់ ក្នុងសង្គ្រាមឆ្នាំ១៩៦៧ ថា ជា​ចំណាត់ការ​ខុសច្បាប់។ សេចក្តីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ បានអំពាវនាវឲ្យ​អ៊ីស្រាអែលបញ្ឈប់សកម្មភាពតាំងទីលំនៅទាំងអស់​។ អ៊ីស្រាអែលបានជំទាស់នឹងករណី​នេះ ដោយផ្ដល់​ហេតុផល​ថា ខ្លួនមានទំនាក់ទំនងប្រវត្តិសាស្ត្រ និងគម្ពីរសាសនា​ទៅនឹងដីនោះ៕