អ្នកឡើងភ្នំជនជាតិអង់គ្លេសវ័យ ៥២ឆ្នាំម្នាក់ បានបំបែកកំណត់ត្រាថ្មី ពេលដែលលោកឡើងដល់កំពូលភ្នំ Everest ជាលើកទី ២០ ។

លោក Kenton Cool បានក្លាយជាអ្នកឡើងភ្នំមិនមែនជនជាតិនេប៉ាល់លើកដំបូងគេ ឡើងដល់កំពូលភ្នំខ្ពស់បំផុតរបស់ពិភពលោកមួយនេះចំនួន ២០លើក នៅមុនពេលព្រឹកថ្ងៃសុក្រនេះ ។

ទោះបីជាយ៉ាងណាក៏ដោយ ពេលរូបលោកអបអរសមិទ្ធិផលរបស់លោកមួយនេះ ហើយចាប់ផ្តើមចុះមកវិញ លោកបានអំពាវនាវឲ្យមានសកម្មភាពដែនកំណត់នៅលើភ្នំកម្ពស់ ៨.៨៤៩ម៉ែត្រមួយនេះ ស្របពេលអ្នកឡើងភ្នំជនជាតិឥណ្ឌា ២នាក់ ត្រូវបានគេរាយការណ៍ថាស្លាប់ ។

លោក Cool ត្រូវបានគេរំពឹងថា នឹងធ្វើដំណើរដល់ជំរំ Base Camp នៅចុងសប្តាហ៍នេះ ក្រោយការឡើងដល់កំពូលភ្នំចុងក្រោយរបស់លោក ។

នៅក្នុងសេចក្តីថ្លែងការណ៍មួយដែលស្រង់ដោយទីភ្នាក់ងារព័ត៌មានរ៉យទ័រ លោក Cool និយាយថា ការឡើងដល់កំពូលភ្នំ Everest មិនមែនស្រួលនោះទេ ឬថាមិនខ្លាចនោះដែរ ។

លោកបន្តថា លោកពឹងផ្អែកលើបទពិសោធន៍របស់លោក ដែលលោកធ្វើដំណោះរដោយសុវត្ថិភាពនៅក្នុងបរិស្ថានបែបនេះ ។ ឈរនៅលើកំពូលភ្នំ Everest លើទី ២០ វាពិតជាពិសេសខ្លាំងណាស់ ។

ភ្នំ Everest លាតសន្ធឹងតាមព្រំដែនរវាងនេប៉ាល់ និងតំបន់ទីបេតិ៍របស់ចិន ហើយនិងអាចឡើងពីភាគីប្រទេសទាំង ២ បានដូចគ្នា ។

ប្រតិបត្តិករឡើងភ្នំ Everest និយាយថា ពុំមានអ្នកឡើងឡើងភ្នំនៅខាងតំបន់ទីបេតិ៍ ក្នុងឆ្នាំនេះឡើយ ស្របពេលដែលអាជ្ញាធរចិន ពុំបានចេញការអនុញ្ញាតណាមួយនោះ ។

ក្រុមអ្នកជំនាញឡើងភ្នំ តែងតែរិះគន់នេប៉ាល់ សម្រាប់ការអនុញ្ញាតឲ្យមានចំនួនអ្នកឡើងភ្នំដ៏ច្រើន ដែលពេលខ្លះនាំឲ្យមានហានិភ័យនៃការស្ទះផ្លូវ ឬការតម្រង់ជួយ៉ាងវែងនៅតំបន់មរណៈ ស្ថិតនៅក្រោមកំពូលភ្នំ ជាទីមានកម្រិតអុកស៊ីហ្សែនធម្មជាតិទាបដ៏គ្រោះថ្នាក់ ដែលត្រូវការឲ្យមនុស្សរស់ ៕