តាកែវ៖ លោក ហ៊ុន ម៉ាណែត តំណាងសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញសម្ពោធអគារសិក្សា១ ខ្នង និងផ្លូវបេតុង១ ខ្សែ ក្នុងវិទ្យាល័យ សុខ អាន ដូងខ្ពស់បូរីជលសារ ស្ថិតក្នុងភូមិដូងខ្ពស់ ឃុំដូងខ្ពស់ ស្រុកបូរីជលសារ ខេត្តតាកែវ នៅថ្ងៃទី១៩ ខែមេសា ឆ្នាំ២០២២។

ក្នុងឱកាសនោះ លោក ហ៊ុន ម៉ាណែត សម្តែងការអបអរសាទរចំពោះសមិទ្ធផល​ដែលបន្តកើតមាន​ក្នុងការសាលារៀន ដែលមានអាយុកាលជាង ៣០ឆ្នាំមួយនេះ ក្រោម​កម្លាំង​សាមគ្គី​ធម៌​របស់​សប្បុរសជន​ជិតឆ្ងាយ ក្នុងការចូលរួមចំណែកអភិវឌ្ឍន៍​វិស័យអប់រំនៅក្នុងស្រុកបូរីជលសារ ក៏ដូចជាក្នុងខេត្តតាកែវ និងនៅទូទាំងប្រទេស។

លោក ហ៊ុន ម៉ាណែត សូមសម្តែងនូវការរំលឹកនឹកគុណ និងឧទ្ទិសបុណ្យ​កុសលជូនដល់វិញ្ញាណក្ខន្ធ​របស់​សម្តេចវិបុលបញ្ញា សុខ អាន ដែលបានខិតខំជួយកសាងសមិទ្ធផលយ៉ាងច្រើន​សន្ធឹកសន្ធាប់​លើគ្រប់វិស័យ ​នៅក្នុងមូលដ្ឋានខេត្តតាកែវ សម្រាប់បន្សល់ទុកជាកេរដំណែលដល់ជំនាន់​ក្រោយៗទៀត។

លោកបញ្ជាក់ថា រាជរដ្ឋាភិបាលដែលដឹកនាំដោយ សម្តេចតេជោ ហ៊ុន សែន តែងបានផ្តល់អាទិភាព​ដល់វិស័យអប់រំ ហើយក៏នឹងបន្តខិតខំអភិវឌ្ឍវិស័យនេះ​ជាមួយនឹងចក្ខុវិស័យច្បាស់លាស់ និង​ការ​សម្លឹង​ទៅអនាគតមួយដ៏ភ្លឺត្រចះត្រចង់ ​ដើម្បីបង្កើតឱកាសសិក្សារៀនសូត្រឱ្យបានទូលំទូលាយ និងប្រកប​ដោយគុណភាព សំដៅធានាបាននូវការរីកចម្រើនរុងរឿងជូនសង្គមគ្រួសារ និង​ប្រទេសជាតិ។

យ៉ាងណាមិញ មូលដ្ឋានគ្រឹះចម្បងនៃដំណើផ្លូវនេះ គឺការថែរក្សាឱ្យបានដាច់ខាត​នូវសុខសនិ្តភាព ដែលជា​កត្តាគ្រប់ដណ្តប់ចម្បងបំផុត ​ដើម្បីធានាបាន​នូវក្តីសង្ឃឹម និង​ឱកាស​ប្រកបដោយ​និរន្តរភាព​ក្នុងការ​អភិវឌ្ឍសង្គមជាតិ លើគ្រប់វិស័យ។

លោកសូមអគុណដល់ពលរដ្ឋនៅក្នុងខេត្តតាកែវ រួមទាំងអ្នកបូរីជលសារនេះផ្ទាល់ ដែលតែង​ជឿជាក់​លើរាជរដ្ឋាភិបាល និងការចូលរួមក្នុងការថែរក្សាសុខសន្តិភាព និងស្ថិរភាព​របស់​ប្រទេស​ជាតិយើង​ ជាពិសេសតាមរយៈការជ្រើសរើស​មេដឹកនាំត្រឹមត្រូវ គឺសម្តេចតេជោ ដែលជាមេដឹកនាំ​ប្រកបដោយធម៌ ព្រមជាមួយនឹងសមត្ថភាព ស្នាដៃ​ និងបទពិសោធន៍យ៉ាងច្រើនលើសលប់ នៅ​ក្នុងការដឹកនាំប្រកបដោយការទទួលខុសត្រូវ​ ម៉ឺងម៉ាត់​ទាំងក្នុងដំណាក់កាលជួបគ្រោះវិបត្តិ និង​នៅ​ក្នុងកិច្ចការកសាង​ និងអភិវឌ្ឍន៍​ជាតិឱ្យរុងរឿងថ្កើងថ្កានទៅមុខ៕