​​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy កាលពី​ថ្ងៃ​ចន្ទ​បាន​ប្រគល់​តារាង​សំណួរ​របស់​សហភាព​អឺរ៉ុប​ ដែល​បាន​បំពេញ​រួច​នូវ​ពាក្យ​ស្នើសុំ​ចូល​ជា​សមាជិក​របស់​ប្លុក​នេះ ​ដល់​ប្រេសិត​សហភាព​អឺរ៉ុប​នៅ​ទីក្រុង​គី​វ​។

​លោក Zelenskyy បាន​ផ្ញើ​តារាង​សំណួរ​ជា​ផ្លូវការ​ ទៅកាន់​ឯកអគ្គរដ្ឋទូត​សហភាព​អឺរ៉ុប​ប្រចាំ​នៅប្រទេស​អ៊ុយ​ក្រែ​នលោក Matti Maasikas និង​បាន​និយាយ​ថា វា​ជា​ជំហាន​ដំបូង​ក្នុង​យុទ្ធនាការ​របស់លោក ដើម្បី​ទទួល​បាន​ការ​ចូល​ជា​សមាជិកភាព​ឲ្យ​កាន់តែ​លឿន​ទៅ​ក្នុង​សហភាព​អឺរ៉ុប​។​ ​តារាង​សំណួរ​ត្រូវ​បាន​ផ្ញើ​មកដល់​លោក Zelenskyy កាលពីដើម​ខែ​មេសា​ដោយ​ប្រធាន​គណៈកម្ម​ការ​អឺរ៉ុប​លោកស្រី Ursula von der Leyen ក្នុងអំឡុងពេល​ដំណើរ​ទស្សនកិច្ច​លើកដំបូង​របស់​លោកស្រី ​មកកាន់​ទីក្រុង​គី​វ​ចាប់​តាំង​ពី​សង្គ្រាម​បាន​ចាប់ផ្តើម​។ ​លោកស្រី​បាន​និយាយ​ថា ​ការសម្រេច​ថា ​តើ​អ៊ុយ​ក្រែ​ន​នឹង​ត្រូវ​បាន​ចាត់ទុកថា​ជា​បេក្ខជន ​អាចធ្វើ​ឡើងក្នុង​រយៈពេល​ប៉ុន្មាន​សប្តាហ៍​ខាងមុខ​។

​ការ​ជំរុញ​របស់​អ៊ុយ​ក្រែ​នដើម្បី​ចូលរួម​ក្នុង​ប្លុក​សហភាព​អឺរ៉ុប​ គឺជា​បញ្ហា​បង្កហេតុ​ជាមួយ​ប្រទេស​រុស្ស៊ីក្នុង​រយៈពេល​ជាច្រើន​ឆ្នាំ​មកហើយ​។ លោក Zelenskyy បាន​និយាយ​នៅក្នុងពេល​ដាក់សំណើ​ថា វា​គឺជា​បំណងប្រាថ្នា​ដែល​ប្រជាជន​របស់​យើង​កំពុង​ឈានឆ្ពោះ​ទៅមុខ និង​ទាម​ទារ​។ យើង​ជឿថា វា​នឹងមាន​លទ្ធផល​វិជ្ជមានសម្រាប់​ប្រវត្តិសាស្ត្រ​របស់​ប្រជាជន​យើង​៕

អត្ថបទ៖ ប៊ុនថន