ក្រុមមនុស្សធម៌របស់អង្គការសហប្រជាជាតិបាននិយាយកាលពីថ្ងៃសុក្រថា មនុស្សរាប់លាននាក់នៅទូទាំងប្រទេសនីហ្សេរីយ៉ា កំពុងត្រៀមខ្លួនសម្រាប់រដូវគ្មានស្បៀងអាហារដ៏អាក្រក់បំផុត មួយក្នុងប្រវត្តិសាស្ត្រ អំឡុងពេលមានជម្លោះ អំពើហិង្សា និងអសន្តិសុខ។

នៅក្នុងសេចក្តីប្រកាសព័ត៌មានមួយ ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា សម្ពាធសេដ្ឋកិច្ច និងការរឹតបន្តឹងផ្នែកហិរញ្ញប្បទានដែលមិនធ្លាប់មានពីមុនមក កំពុងជំរុញឲ្យប្រជាជននីហ្សេរីយ៉ាធ្លាក់ដល់ស្ថានភាពលំបាកដ៏ធ្ងន់ធ្ងរ។

ក្រុមការងារមនុស្សធម៌ប្រចាំប្រទេសរបស់UNនៅនីហ្សេរីយ៉ា បានរាយការណ៍ថា មនុស្សជិតម្នាក់ក្នុងចំណោម ៧នាក់ ឬមនុស្ស ៣៥ លាននាក់ទូទាំងប្រទេសនេះ ទំនងជាប្រឈមមុខនឹងអសន្តិសុខស្បៀងដ៏ ស្រួចស្រាវក្នុងអំឡុងរដូវគ្មានស្បៀងអាហារឆ្នាំនេះ ចាប់ពីខែមិថុនាដល់ខែសីហា។ នេះបើយោងតាមការិយាល័យសម្របសម្រួលកិច្ចការមនុស្សធម៌។

ការិយាល័យនេះ បាននិយាយថា៖«បញ្ហានេះធ្វើឲ្យប្រទេសនីហ្សេរីយ៉ាក្លាយជាវិបត្តិអត់ឃ្លានដ៏ធំបំផុតមួយរបស់ពិភពលោក ដោយបន្ទុកធ្លាក់យ៉ាងខ្លាំងទៅលើភាគខាងជើងប្រទេសនីហ្សេរីយ៉ា»។ «ប្រសិនបើជំនួយត្រូវបានពន្យារពេលបន្ថែមទៀត ប្រជាជនរាប់លាននាក់នឹងត្រូវបង្ខំឲ្យកាត់បន្ថយអាហារបន្ថែមទៀត លក់ទ្រព្យសម្បត្តិ និងឲ្យកូនៗរបស់ពួកគេឈប់រៀន»៕