​បាល់ទាត់៖ ​ក្រុម​ជើងឯក​លី​គ​កំពូល​ជប៉ុន Kawasaki Frontale បាន​យកឈ្នះ​ក្រុម​ចិន Guangzhou FC ដល់​ទៅ ៨-០ ក្នុងការ​ប្រកួត​ទី២ ក្នុង​ពូ​ល I ក្របខណ្ឌ AFC Champions League​។ ​​

ការប្រកួត​ដែល​ធ្វើឡើង​នៅ​កីឡដ្ឋាន Tan Sri Dato HJ Hassan Yunos ទឹកដី​ម៉ាឡេស៊ី កីឡាករ​ថៃ Chanathip Songkrasin ក៏​រកបាន​គ្រាប់​ដំបូង​របស់ខ្លួន​ផងដែរ​តាំងពី​ផ្ទេរ​ទៅ Kawasaki Frontale នៅ​នាទី​ទី៦៩ ដែលជា​គ្រាប់​នាំមុខ ៧-០ ក្នុងការ​ប្រកួត ខណៈដែល​កីឡាករ Yu Kobayashi រកបាន Hat-Trick​។​ ​​បី​ពិន្ទុ​នេះ​ធ្វើឱ្យ Kawasaki Frontale ឈរ​លេខ ២ ក្នុង​ពូ​ល​មាន ៤ពិន្ទុ ​ខណៈ​ក្រុម​ដែល​ឈរលើ​គេ​គឺ​ក្រុម​ម៉ាឡេស៊ី Johor Darul Ta’Zim ដែល​បាន​យកឈ្នះ Ulsan Hyundai ២-១ មាន ៦ពិន្ទុ​ពេញ​ពី​ជ័យជំនះ ២ប្រកួត​ផ្ទួន​។ ​​ចំណែក​នៅក្នុង​ពូ​ល G ក្រុម​ជើងឯក​ថៃ BG Pathum United រកបាន​ជ័យជំនះ​ក្នុងការ​បង្ហាញខ្លួន​ដំបូង​នៅ​ក្របខណ្ឌ AFC Champions League នេះ​ក្រោយ​យកឈ្នះ Jeonnam Dragons ២-០​។

​​ជ័យជំនះ​នេះ​ធ្វើឱ្យ BG Pathum United ឈរ​លេខ ២ ក្នុង​ពូ​ល​មាន ៤ពិន្ទុ​ស្មើគ្នា​ជាមួយ​ក្រុម​លេខ ១ គឺ​ក្រុម​អូស្ត្រាលី Melbourne City ដែល​បាន​យកឈ្នះ​ក្រុម​ហ្វីលីពីន United City ៣-០​។ ​​ដោយឡែក​នៅក្នុង​ពូ​ល F វិញ​ក្រុម​ជប៉ុន Urawa Red Diamonds យកឈ្នះ​ក្រុម​ចិន Shandong Taishan ៥-០ ដើម្បី​ទទួលបាន ៣ពិន្ទុ​លើក​ទី២ មាន ៦ពិន្ទុ​ពេញ​ឈរលើ​គេ​ក្នុង​ពូ​ល F​។ ​​ចុងក្រោយ​នេះ​គឺ​ក្លិប​សិង្ហ​បុរី Lion City Sailors FC បាន​យកឈ្នះ​ក្រុម​កូរ៉េ Daegu FC ៣-០ ដើម្បី​ឈរ​លេខ ២ ក្នុង​ពូ​ល​មាន ៣ពិន្ទុ​៕

​អត្ថបទ​៖​នាង សុភា​វុ​ធ