ក្រុម​​អាជ្ញាធរកុងហ្គោនិយាយថា ករណីសង្ស័យថា​បានឆ្លង​​ជំងឺអេបូឡាបានកើនឡើង​​លើសពី៩០០​​ នាក់​​ហើយក្នុងការផ្ទុះរាលដាល​​​នៃជំងឺនេះ នៅភាគខាងកើតប្រទេស ខណៈបុគ្គលិកសុខាភិបាលប្រឈមការវាយប្រហារ និងកង្វះខាតសម្ភារៈវេជ្ជសាស្ត្រ​។​ ​​ ​​

ក្រសួងទំនាក់ទំនងកុងហ្គោ ក្នុងការបង្ហោះមួយលើបណ្ដាញ​សង្គម​ X កាលពីថ្ងៃអាទិត្យ បាន​និយាយថា មានករណីសង្ស័យ​​៩០៤​​ករណី និងករណីសង្ស័យថា​បានស្លាប់​ដោយសារ​ជំងឺ​អេបូឡា​ មានចំនួន ​១១៩​ នាក់        ខណៈអ្នកស្លាប់​​​សរុបឡើងដល់​ជាង​២០០​នាក់​។ ​​​​​ក្រុម​​អាជ្ញាធរធ្លាប់​បាន​​ប្រកាសពីករណីសង្ស័យថាមានជំងឺអេបូឡាជាង ​៧០០ ករណី និងករណីសង្ស័យថាបានស្លាប់ទាក់ទងនឹង​ជំងឺនេះ ​ជាង១៧០ ​​នាក់ ភាគច្រើននៅក្នុងខេត្ត Ituri ជាចំណុច​កណ្ដាលនៃការផ្ទុះឡើងនៃជំងឺនេះ។

អង្គការសុខភាពពិភពលោកនិយាយថាការផ្ទុះឡើងនៃជំងឺនេះឥឡូវនេះបង្កហានិភ័យខ្ពស់ណាស់សម្រាប់សាធារណរដ្ឋប្រជាធិបតេយ្យកុងហ្គោប៉ុន្តែហានិភ័យនៃការរាលដាលជំងឺនេះនៅទូទាំងពិភពលោកនៅតែទាប។​លោក Jean Kaseya ប្រធានមជ្ឈមណ្ឌលគ្រប់គ្រង និងបង្ការជំងឺអាហ្វ្រិក (Africa CDC) បាននិយាយ ដោយរាយបញ្ជីប្រទេសអង់ហ្គោឡា ប៊ូរុនឌី សាធារណរដ្ឋអាហ្វ្រិកកណ្តាល សាធារណរដ្ឋកុងហ្គោ អេត្យូពី កេនយ៉ា រវ៉ាន់ដា ស៊ូដង់ខាងត្បូង តង់ហ្សានី និងហ្សំប៊ី ថា ពួកលោកមានប្រទេសចំនួន ១០ ដែលប្រឈមនឹងហានិភ័យនៃការឆ្លងរាលដាលជំងឺអេបូឡា។

ក្រុម​​​អាជ្ញាធរសុខាភិបាលក្នុងប្រទេសនេះ​កំពុងប្រឈមនឹងបញ្ហាប្រឈមធ្ងន់ធ្ងរជាច្រើន​​​ ខណៈពួកគេព្យាយាមទប់ស្កាត់ការផ្ទុះឡើងនៃជំងឺនេះ ដែលត្រូវបានប្រកាសថាជាគ្រាអាសន្នសុខភាពសកល។

មានការវាយប្រហារដោយដុតបំផ្លាញមជ្ឈមណ្ឌលព្យាបាលជំងឺអេបូឡានៅភាគខាងកើតប្រទេស ដោយ​​មជ្ឈមណ្ឌលពីរកន្លែងនៅក្នុងទីក្រុងចំនួន​ពីរត្រូវបានវាយប្រហារកាលពីសប្តាហ៍មុន ជាការ​បង្ហាញពីកំហឹងនៅក្នុងតំបន់ដែលឡោមព័ទ្ធដោយអំពើហិង្សាទាក់ទងនឹងក្រុមឧទ្ទាមប្រដាប់អាវុធ ការភៀសខ្លួន​ចេញពីទីលំនៅរបស់ប្រជាជនមួយចំនួនធំ ការបរាជ័យរបស់រដ្ឋាភិបាលក្នុងតំបន់ និងការកាត់បន្ថយជំនួយអន្តរជាតិ ដែលក្រុម​អ្នកជំនាញនិយាយថាបានរុញឲ្យ​​មណ្ឌលសុខភាពនៅក្នុងសហគមន៍ងាយរងគ្រោះ៕