កំពត៖ មន្ត្រីជលផល បានអះអាងថា បច្ចុប្បន្ន ក្នុងដែនសមុទ្រនៃខេត្តកំពត មិនមានការប្រើប្រាស់ឧបករណ៍ នេសាទខុសច្បាប់ទៀតទេ លើកលែងតែទូកអូសគូរបស់បរទេស ដែលបានលួចចូលមកនៅពេលយប់ម្តងម្កាល។

នាយខណ្ឌរដ្ឋបាលជលផលខេត្តកំពត លោក ស សូរិន បានឲ្យដឹងថា ប្រជានេសាទក្នុងខេត្តកំពត នៅពេលនេះ មានការយល់ដឹងច្រើនហើយ បន្ទាប់ពីមានការណែនាំដោយផ្ទាល់ពីសំណាក់​ឯកឧត្តមអភិ បាលខេត្តកំពត ក៏ដូចជាមន្ត្រីជំនាញនាពេលកន្លងមក។

មន្ត្រីជំនាញរបស់លោកធ្វើការល្បាតជាប្រចាំ ដោយសហការជាមួយ អាជ្ញាធរ និងគណៈកម្មការ​សហគមន៍​នេសាទទាំង៩ នៅក្នុងខេត្ត ​ដោយពិនិត្យលើការកាប់បំផ្លាញ់ព្រៃកោងកាង និងការ​ប្រើប្រាស់​ឧបករណ៍​ខុសច្បាប់ជាដើម។

លោក បានបន្តថា នៅក្នុងរយៈពេលបីខែដើមឆ្នាំនេះ ការងារបង្ក្រាបបទល្មើលនេសាទ មាន​ចំនួន​២១ករណី ក្នុងនោះបានរឹបអូស ​និងដុតបំផ្លាញលបកន្ទុយកណ្តុរ ៧ករណី ឈិបរុញដៃភ្ជាប់​ឧបករណ៍​ឆក់ ​៩ករណី ​ពិន័យអន្តរកាល៥ករណី ​មានការដឹកជញ្ជូនផលនេសាទគ្មាន​លិខិត​អនុញ្ញាត​៤ករណី និងនេសាទប្រើឧបករណ៍ឆក់១ករណី។

លោក នាយខណ្ឌរដ្ឋបាលជលផល​ បានបញ្ជាក់ទៀតថា ​បច្ចុប្បន្ន នៅក្នុងដែនសមុទ្រ​ខេត្តកំពត​គ្មានបទល្មើស​ ឬការប្រើប្រាស់ឧបករណ៍ខុសច្បាប់ទេ ​ខណៈដែលសកម្មភាពចូលរួមអភិរក្ស និង​ដាំដើម​កោងកាងឡើងវិញ ​កាន់តែផុលផុសជាងមុន។

ប្រជានេសាទនៅខេត្តកំពត ​បានអះអាងថា ​ពួកគេ​ លែងប្រើឧបករណ៍ខុសច្បាប់ទៀតហើយ ហើយ​ការងារនេសាទក៏គ្មានការបង់ប្រាក់ដែរ។​ របរនេសាទ​ ទោះមិនបានកម្រៃច្រើន ប៉ុន្តែវានៅ​អាច​ដោះស្រាយ​ជីវភាព និងទំនុកបម្រុងក្រុមគ្រួសាររបស់ពួកគេបាននៅឡើយ។

លោក ស សូរិន នាយខណ្ឌរដ្ឋបាលជលផលខេត្តកំពត ​បានឱ្យដឹងដែរថា ​ផលនេសាទ រយៈពេល៣ខែ​ ដើមឆ្នាំនេះ ​មានចំនួនជាង៦០០០តោន ​ហើយមន្ត្រីរបស់លោក បានបណ្តុះដើម​កោងកាង​ជិតពីម៉ឺនដើម ​និងបានដាំកោងកាង ​ចំនួនជាង ១ម៉ឺនដើម ​ដើម្បី​ជា​ជម្រក​របស់ជីវៈចម្រុះ សម្រាប់​ជួយ​ដល់ប្រជានេសាទ៕ អត្ថបទ៖ អន សារឹម