បាត់ដំបង៖ ក្នុងត្រីមាសទី១ ឆ្នាំនេះ ខណ្ឌរដ្ឋបាលជលផលខេត្តបាត់ដំបង បានឃាត់ខ្លួនជនប្រព្រឹត្តបទល្មើសនេសាទចំនួន៥នាក់ បញ្ជូនទៅតុលាការ ។

លោក ជួង សុភា នាយខណ្ឌរដ្ឋបាលជលផលខេត្តបាត់ដំបង បានប្រាប់BTVនៅព្រឹកថ្ងៃទី១៩ ខែ មេសានេះថា ត្រីមាសទី១ ឆ្នាំនេះ មន្ត្រីជលផលបានបង្ក្រាបបទល្មើសនេសាទ ចំនួន៣៨ករណី ជា​ពិសេស​ក្រោយពីមានបទបញ្ជាពីសម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា មន្រ្តីជលផល អាជ្ញាធរ និងកម្លាំងចម្រុះ បានចុះបង្រ្កាបបទល្មើសនេសាទនៅលើបឹងទន្លេសាបជាបន្តបន្ទាប់ រហូតធ្វើឱ្យបទល្មើស ក្នុងភូមិសាស្រ្តខេត្តបាត់ដំបង លែងកើតមានទៀតហើយ។

លោក បានបញ្ជាក់ថា ក្រៅពីការងារបង្ក្រាបបទល្មើសជលផល ក្រុមការងាររបស់លោក បាន​សហការជាមួយកម្លាំងអាជ្ញាធរមូលដ្ឋាន ​និងអង្គការជាដៃគូ ចុះផ្សព្វផ្សាយអំពីវិធានការនានា​របស់​រាជរដ្ឋាភិបាល ក្នុងការធ្វើឱ្យប្រសើរឡើងនូវ​ធនធាន​មច្ឆជាតិ​ នៅកម្ពុជា ​ដល់ប្រជាសហគមន៍​នេសាទ ជាពិសេសអ្នកដែលរស់នៅលើផ្ទះបណ្ដែតទឹកក្នុងតំបន់ព្រៃលិចទឹក ​នៃតំបន់បឹងទន្លេសាប ដើម្បីឱ្យពួកគេ​បានយល់ដឹង ​និងចូលរួមទប់ស្កាត់បទល្មើសជលផល និងបទល្មើសកាប់រាន​ឈូសឆាយ​បំផ្លាញ​ដីព្រៃលិចទឹក ។

សេចក្ដីជូនដំណឹងរបស់រដ្ឋបាលខេត្តបាត់ដំបង បានអំពាវនាវដល់ប្រជានេសាទទាំងអស់ ដែល មានឧបករណ៍នេសាទល្មើសច្បាប់ រួមមាន អួនអូសទឹកសាប ម៉ាញ់ ឧបករណ៍ឆក់ និងឈិបយន្ត ព្រមទាំង ឧបករណ៍នេសាទល្មើសច្បាប់ដទៃទៀត ត្រូវប្រគល់ជូនអាជ្ញាធរមាន​សមត្ថកិច្ច​នៅក្នុងមូលដ្ឋានរៀងៗខ្លួន រហូតដល់​ ថ្ងៃទី១៥​ ខែឧសភា​ ឆ្នាំ២០២២ ជាកំហិត» ៕ អត្ថបទ៖ នឿត សុភក្ត្រ