សារព័ត៌មាន​​ Telegraph ​បាន​​រាយការណ៍​​កាលពីថ្ងៃ ២៤ ឧសភា ដោយដកស្រង់ប្រភពពី​សម្ព័ន្ធភាព​​​មួយ​ថា​ ចក្រភពអង់គ្លេស បារាំង និងរដ្ឋជាសមាជិក​​ណាតូផ្សេងទៀតបានរារាំងផែនការមួយដែលសមាជិកនីមួយៗនឹងចូលរួមចំណែក ​០,២៥% នៃផលិតផលក្នុងស្រុកសរុប (GDP) របស់ពួកគេដល់ជំនួយយោធាសម្រាប់អ៊ុយក្រែន ។

​អគ្គលេខាធិការណាតូ លោក Mark Rutte បានប្រាប់ក្រុម​​អ្នកសារព័ត៌មានកាលពី​​ថ្ងៃទី ២២ ខែឧសភាថា សំណើនេះទំនងជាត្រូវបានបដិសេធ។

លោកបាននិយាយថា រូបលោក​​​មិនគិតថាសំណើនេះនឹងត្រូវបានទទួលយកទេ ព្រោះមានការប្រឆាំងជាច្រើនចំពោះ​​​ចំនួន​​ ០,២៥%​នេះ។

លោក Rutte ពុំ​បានប្រាប់ឈ្មោះសមាជិកដែលរារាំងសំណើនោះទេ ប៉ុន្តែប្រភពរបស់ណាតូបានប្រាប់ សារព័ត៌មាន​​ Telegraph ថា អ្នកប្រឆាំងគឺចក្រភពអង់គ្លេស បារាំង កាណាដា អ៊ីតាលី និងអេស្ប៉ាញ។ ប្រភពបាននិយាយថា ពួកគេមិនមានភាពរីករាយចំពោះគំនិតនេះទេ។

ដំណឹង​នេះកើតឡើងបន្ទាប់ពីចក្រភពអង់គ្លេសបានបន្ធូរបន្ថយទណ្ឌកម្មប្រេងរបស់រុស្ស៊ីដ៏គួរឱ្យភ្ញាក់ផ្អើល ដែលបណ្តាលឱ្យមានការវាយប្រហារបន្ថែមទៀតទៅលើមុខមាត់​របស់ទីក្រុងឡុងដ៍្រ​​ក្នុងនាមជាដៃគូដ៏រឹងមាំបំផុតមួយរបស់អ៊ុយក្រែន។

ចក្រភពអង់គ្លេសបានបង្កឱ្យមានការភ្ញាក់ផ្អើល និងការខឹងសម្បារកាលពី​​ថ្ងៃ១៩ ឧសភា​កន្លងទៅ​នេះ​​ ដោយការចេញអាជ្ញាប័ណ្ណបណ្ដោះអាសន្នដោយស្ងាត់ៗ ដែលអនុញ្ញាតឱ្យនាំចូលប្រេងម៉ាស៊ូត និងប្រេងឥន្ធនៈយន្តហោះ​ផលិតពីប្រេងរបស់រុស្ស៊ី ប្រសិនបើ "ផលិតផលទាំងនោះត្រូវបានកែច្នៃនៅក្នុងប្រទេសទីបី"។ រាជរដ្ឋាភិបាលក៏បានផ្តល់អាជ្ញាប័ណ្ណដែលអនុញ្ញាតឱ្យមានការដឹកជញ្ជូន ​និង​​ចែក​ចាយឧស្ម័នធម្មជាតិរាវ (LNG) តាមសមុទ្រពីស្ថានីយ Sakhalin-2 ឬ Yamal LNG របស់រុស្ស៊ីផងដែរ៕