មេបញ្ជាការកងទ័ពបាននិយាយកាលពីថ្ងៃអាទិត្យថា យោធាអ៊ីស្រាអែលត្រៀមខ្លួនរួចជាស្រេចដើម្បីបន្តប្រតិបត្តិការប្រយុទ្ធប្រឆាំងនឹងអ៊ីរ៉ង់ ស្របពេលមានរបាយការណ៍អំពីវឌ្ឍនភាពនៅក្នុងកិច្ចចរចារវាងសហរដ្ឋអាមេរិក និងអ៊ីរ៉ង់។

នាយអគ្គសេនាធិការកងទ័ព លោក Eyal Zamir បានធ្វើការអត្ថាធិប្បាយនេះ អំឡុងពេលវាយតម្លៃស្ថានភាព នៅទីបញ្ជាការភាគខាងជើងរបស់យោធា។ នេះបើយោងតាមសេចក្តីថ្លែងការណ៍មួយ។

លោក Zamir បាននិយាយថា យោធាអ៊ីស្រាអែល «ត្រៀមខ្លួនរួចជាស្រេចដើម្បីបន្តប្រតិបត្តិការប្រយុទ្ធដ៏ខ្លាំងក្លាភ្លាមៗ» និងធ្វើឲ្យសមត្ថភាពរបស់អ៊ីរ៉ង់ចុះខ្សោយបន្ថែមទៀត ដោយបន្ថែមថា «យើងនឹងបន្តការត្រៀមខ្លួន និងភាពបត់បែនប្រតិបត្តិការឲ្យបានយូរ តាមតម្រូវការចាំបាច់។

ការអត្ថាធិប្បាយនេះ បានធ្វើឡើង នៅពេលដែលសហរដ្ឋអាមេរិក និងអ៊ីរ៉ង់ បានរាយការណ៍ពីវឌ្ឍនភាពនៅក្នុងកិច្ចចរចាដែលមានគោលបំណងបន្តបទឈប់បាញ់ និងបើកច្រកសមុទ្រហ័រមូសឡើងវិញ ទោះបីជាមានការខ្វែងគំនិតគ្នាលើកម្មវិធីនុយក្លេអ៊ែររបស់ទីក្រុងតេអេរ៉ង់ក៏ដោយ។

គណៈរដ្ឋមន្ត្រីសន្តិសុខរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ត្រូវបានគេរំពឹងថា កោះប្រជុំនាល្ងាចថ្ងៃអាទិត្យ ស្របពេលមានការវិវត្តថ្មីៗ។

លោក Zamir ក៏បាននិយាយផងដែរថា កងកម្លាំងអ៊ីស្រាអែល កំពុងបន្តវាយប្រហារក្រុមហេសបូឡា «គ្រប់ទីកន្លែង» នៅក្នុងប្រទេសលីបង់៕