មន្ត្រីជាន់ខ្ពស់​ផ្នែក​ការបរទេសរបស់​កោះ​តៃវ៉ាន់ នៅថ្ងៃចន្ទ (ទី២៥ ខែឧសភា ឆ្នាំ​២០២៦) នេះ​ បាន​និយាយ​ថា ការជជែក​តាម​ទូរស័ព្ទ រវាងមេដឹកនាំសហរដ្ឋអាមេរិក និងកោះតៃវ៉ាន់ នឹងជារឿងវិជ្ជមាន ប៉ុន្តែវាអាស្រ័យលើលោក​ប្រធានាធិបតី Donald Trump ក្នុងការផ្ដួចផ្ដើម​រឿង​នេះ​ ខណៈ​ដែល​​ភាគីទាំង២ មិនទាន់​បាន​ពិភាក្សា អំពីការសន្ទនា​ណាមួយនៅ​ឡើយទេ​។

ជំនួប​តាម​ទូរស័ព្ទ រវាងមេដឹកនាំទាំង២ នឹងមិនធ្លាប់មានពីមុនមកទេ ហើយប្រឈមនឹង​ហានិភ័យធ្វើ​ឲ្យ​មាន​ការរង្គោះរង្គើ ក្នុង​ទំនាក់ទំនងរបស់ទីក្រុងវ៉ាស៊ីនតោន ជាមួយក្រុង​ប៉េកាំងដែលចាត់ទុកកោះ​ស្វ័យ​គ្រប់គ្រងដោយ​លទ្ធិ​ប្រជាធិបតេយ្យមួយ​នេះថា ជាទឹកដីរបស់ខ្លួន។

ប្រធានាធិបតីសហរដ្ឋអាមេរិក និងមេដឹកនាំ​កោះ​តៃវ៉ាន់ មិនបានជជែក​គ្នាដោយផ្ទាល់ឡើយ ចាប់តាំងពីទីក្រុងវ៉ាស៊ីនតោន បានបង្វែរ​ការទទួលស្គាល់ការទូតពីទីក្រុងតៃប៉ិ ទៅទីក្រុងប៉េកាំងវិញ ក្នុងឆ្នាំ១៩៧៩។

លោក Trump បានលើក​ឡើង​ម្តងទៀតកាលពី​ថ្ងៃទី២០​ ខែឧសភាថា លោកនឹងជជែក​ជាមួយមេដឹកនាំ​កោះ​តៃវ៉ាន់ លោក​ Lai Ching-te ដោយធ្វើ​ឲ្យបាត់​នូវ​ការរំពឹងទុកពី​ដំបូង ដែល​ថា ការលើកឡើងលើកដំបូងរបស់លោក អំពីករណី​នេះ បន្ទាប់ពីបាន​ជួបជាមួយប្រធានាធិបតីចិន លោក​ Xi Jinping នា​ដើមខែឧសភានេះ​ គឺជាការនិយាយខុស​ដោយ​អចេតនា​។

ជា​ការឆ្លើយសំណួរជាមួយតំណាងរាស្ត្រ នៅសភា មន្ត្រី​ជាន់ខ្ពស់​ការបរទេសកោះ​តៃវ៉ាន់ លោក​ Lin Chia-lung បាននិយាយថា គំនិតផ្តួចផ្តើមឲ្យមានការ​ជជែក​តាម​ហៅទូរស័ព្ទ គឺអាស្រ័យលើលោក Trump ប៉ុន្តែបញ្ជាក់​ថា មិនទាន់មានការពិគ្រោះយោបល់ទ្វេភាគីអំពីជំនួប​បែប​នេះ​នៅឡើយទេ។ លោក Lin បាននិយាយ​ថា៖ «ប្រសិនបើមានការសន្ទនាតាម​ទូរស័ព្ទ រវាងប្រមុខរដ្ឋរបស់​សហរដ្ឋអាមេរិក និងមេដឹកនាំ​កោះ​តៃវ៉ាន់ ខ្ញុំ​គិតថា យើងនឹងមើល​ឃើញ​ពី​ភាព​វិជ្ជមានខ្លាំង​ណាស់​»៕