បណ្ដាញសារព័ត៌មាន​ក្នុងស្រុក នៅ​ថ្ងៃចន្ទ (ទី២៥ ខែឧសភា ឆ្នាំ២០២៦) នេះ បាន​រាយការណ៍​ថា រដ្ឋាភិបាលម៉ាឡេស៊ីត្រៀមប្តឹងអ៊ីស្រាអែលទៅតុលាការយុត្តិធម៌អន្តរជាតិ (ICJ) ពីបទចាប់ជំរិត និងធ្វើទារុណកម្មលើ​សកម្មជនពីកងនាវា​មនុស្សធម៌ Global Sumud Flotilla ដែលធ្វើ​ដណើរឆ្ពោះទៅកាន់តំបន់​ហ្កាហ្សា។

បើយោងតាមការចុះផ្សាយរបស់សារព័ត៌មាន​ Malay Mail បាន​ឲ្យ​ដឹង​ថា រដ្ឋមន្ត្រីប្រចាំរដ្ឋ Selangor របស់​ប្រេទេស​ម៉ាឡេស៊ី លោក Amirudin Shari បាននិយាយថា ទីក្រុងគូឡាឡាំពួរ នឹងចាប់ផ្តើមនីតិវិធី​ភ្លាមៗ នៅពេលដែលមេធាវីបញ្ចប់សព្វគ្រប់នូវ​ដំណើរការ​ប្រមូលព័ត៌មាន និងភស្តុតាងគាំទ្រ។

អំឡុង​ពេល​និយាយក្នុង​​ពិធីស្វាគមន៍​ការ​វិល​មក​វិញ​របស់កង​​នាវា Global Sumud Flotilla 2.0 នៅឯ​អាកាសយានដ្ឋានអន្តរជាតិគូឡាឡាំពួរ (Kuala Lumpur International Airport) លោក Amirudin បានបញ្ជាក់​ថា៖ «យើងនឹងមិននៅស្ងៀមទេ យើងនឹងមិនឈប់ឡើយ​។ ខណៈពេលដែលក្រុមអ្នកច្បាប់ប្រមូលឯកសារទាំងអស់ ស្តីពីការរំលោភច្បាប់អន្តរជាតិ ពួកគេ (អ្នកចូលរួមកងនាវាមនុស្ស​ធម៌) ត្រូវបានចាប់ជំរិតច្រើនជាងមួយ​លើក​ ពួកគេត្រូវបានធ្វើទារុណកម្ម»។

លោក​បាន​និយាយ​​ថា៖ «យើងនឹងនាំយកករណី​នេះទៅតុលាការអន្តរជាតិ​ (ICJ) យើងនឹងបន្តសម្ពាធការទូត ហើយយើងក៏នឹងធ្វើដំណើរផង​ដែរ​នៅ​ទូទាំង​ប្រទេសម៉ាឡេស៊ី ដើម្បី​ស្វែង​រក​គាំទ្រ»។ លោក Amirudin បានបន្ថែម​ថា សកម្មភាពផ្លូវច្បាប់នេះធ្វើឡើងបន្ទាប់ពីមាន​ការ​ចោទ​ប្រកាន់អំពីអំពើឃោរឃៅ ក្នុង​នោះ​រួមទាំងការចាប់ជំរិត និងការធ្វើទារុណកម្មដែលពាក់ព័ន្ធនឹងសកម្មជនកងនាវាមនុស្ស​ធម៌ ជាពិសេសអ្នកចូលរួមជា​ជនជាតិ​ម៉ាឡេស៊ី។

គួរបញ្ជាក់​ថា សកម្មជនអន្តរជាតិជាង ៤០០នាក់ នៅលើកងនាវា​មនុស្ស​ធម៌ ដែលមានគោលបំណងទម្លុះ​ការបិទខ្ទប់​ផ្លូវទឹករបស់អ៊ីស្រាអែល ចំពោះ​តំបន់​ហ្កាហ្សា ដើម្បីផ្តល់ជំនួយ ត្រូវបានវាយប្រហារ និងចាប់​ឃុំខ្លួន ដោយកងកម្លាំងអ៊ីស្រាអែលកាលពីសប្តាហ៍មុន នៅក្នុងដែនទឹកអន្តរជាតិ៕