កំពង់ស្ពឺ៖ បន្ទាប់ពីមានការណែនាំជាប្រចាំរបស់ ឯកឧត្តម យឿន យឿត អនុប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកឱរ៉ាល និងជាប្រធានក្រុមការងារចុះជួយឃុំតាសាល ស្រុកឱរ៉ាល់ ខេត្តកំពង់ស្ពឺ នៅថ្ងៃទី១៩ ខែមេសា ឆ្នាំ២០២២នេះ ក្រុមការគណបក្សឃុំតាសាល បានបន្តចុះសំណេះសំណាល និងសួរសុខទុក្ខដល់បងប្អូនប្រជាពលរដ្ឋនៅតាមខ្នងផ្ទះ ដើម្បីស្វែងយល់អំពីការរស់នៅជាប្រចាំថ្ងៃរបស់បងប្អូនប្រជាពលរដ្ឋ។

 ឯកឧត្តម យឿន យឿត បានថ្លែងថា ការចុះសំណេះសំណាលដល់បងប្អូនប្រជាពលរដ្ឋជាប្រចាំនេះ គឺនឹងធ្វើឡើងឲ្យគ្រប់ភូមិទាំងអស់នៃឃុំតាសាល ខណៈបច្ចុប្បន្នក្រុមការងារគណបក្សបានចុះជួបដោយផ្ទាល់ជាមួយពួកគាត់បាន៥០ភាគរយនៃប្រជាជននៅក្នុងឃុំហើយ ។ 

ក្រៅពីស្វែងយល់អំពីការ រស់នៅរបស់បងប្អូនប្រជាពលរដ្ឋក្រុមការងារក៏បានចុះចែកអំណោយដល់ពួកគាត់ផងដែរ។ ជាមួយគ្នានោះ ក្រុមការងារគណបក្សក៏បានពន្យល់ និងណែនាំបន្ថែមដល់សមាជិក-សមាជិកាគណបក្ស ក៏ដូចជាបងប្អូន ប្រជាពលរដ្ឋអំពីគោលនយោបាយរបស់គណបក្សប្រជាជនកម្ពុជាផងដែរ ខណៈគណបក្សដ៏ធំជាងគេនៅកម្ពុជានេះគឺរួមសុខរួមទុក្ខជាមួយបងប្អូនប្រជាពលរដ្ឋខ្មែរគ្រប់ពេលវេលា និងគ្រប់កាលៈទេសៈទាំងអស់។

ជាមួយគ្នានោះក្រុមការងារក៏បាន បន្តប្រាប់ដល់បងប្អូនប្រជាពលរដ្ឋសូមបន្តជឿទុកចិត្តមកលើ ការដឹកនាំរបស់សម្តេចតេជោនាយករដ្ឋមន្រ្តី តាមរយៈការបោះឆ្នោតជូនសម្តេច ដើម្បីបន្តដឹកនាំនាវាកម្ពុជាឆ្ពោះទៅរកវឌ្ឍភាពរុងរឿងបន្ថែមទៀតលើគ្រប់វិស័យ៕