ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃចន្ទ (ទី២៥ ខែឧសភា ឆ្នាំ២០២៦) នេះថា ប្រទេស​កូរ៉េខាងជើងនឹងរៀបចំកិច្ចប្រជុំពេញអង្គរបស់គណបក្សពលករកូរ៉េ (WPK) ដែលកំពុងកាន់អំណាច នៅខែក្រោយ​។

ទីភ្នាក់ងារសារព័ត៌មានកណមជ្ឈិម​កូរ៉េ (KCNA) បានរាយការណ៍ថា ការិយាល័យនយោបាយរបស់ WPK បានសម្រេចរៀបចំកិច្ចប្រជុំពេញអង្គលើកទី២ នៃគណៈកម្មាធិការមជ្ឈិម​លើកទី៩ នៅចុងខែមិថុនាខាង​មុខ​។

KCNA បានឲ្យ​ដឹង​ថា កិច្ចប្រជុំនេះនឹងត្រូវបានរៀប​ចំឡើង «ដើម្បីពិនិត្យឡើងវិញជាបណ្តោះអាសន្ន អំពីការអនុវត្តគោលនយោបាយរបស់គណបក្ស និងរដ្ឋ សម្រាប់ឆ្នាំ២០២៦ និងពិភាក្សាអំពីការងារ នៅក្នុងឆមាសទី២ នៃឆ្នាំនេះ និងបញ្ហាសំខាន់ៗមួយចំនួនទៀត»​។

គួរបញ្ជាក់​ថា កូរ៉េខាងជើងតែងតែរៀបចំកិច្ចប្រជុំពេញអង្គ នៅចុងខែមិថុនា និងខែធ្នូ ខណៈពេលដែលក៏កោះប្រជុំផងដែរ នៅពេលដែលបញ្ហាសំខាន់ៗ ចាំបាច់​ត្រូវពិភាក្សា។

កិច្ចប្រជុំខែមិថុនា ដែលត្រូវ​បានគ្រោងទុកនេះ បានកើតឡើងនៅពេលដែលកូរ៉េខាងជើងស្វែងរកការអនុវត្តវិធានការតាមដាន សម្រាប់ការសម្រេចចិត្តដែលបានធ្វើឡើងនៅក្នុងសមាជគណបក្សលើកទី៩ ដែលបានរៀប​ចំ​ឡើងកាល​ពី​ចុងខែកុម្ភៈ៕