អ្នកនាំពាក្យក្រសួងការបរទេស បាន​ឲ្យ​ដឹង​នៅ​ថ្ងៃ​ចន្ទ (ទី២៥ ខែឧសភា ឆ្នាំ២០២៦) នេះថា រដ្ឋ​មន្ត្រី​ការ​បរទេស​អ៊ីរ៉ង់ លោក Abbas Araghchi នឹង​មិនមាន​វត្តមានក្នុង​កិច្ចប្រជុំរបស់​ក្រុមប្រឹក្សាសន្តិសុខអង្គការសហប្រជាជាតិ (UNSC) នៅថ្ងៃអង្គារឡើយ ដោយសារបញ្ហាទាក់ទងនឹងទិដ្ឋាការអាមេរិក។

នៅក្នុងសុន្ទរកថាដែលចុះផ្សាយដោយទីភ្នាក់ងារសារព័ត៌មានរដ្ឋ IRNA លោក Esmail Baqaei បានប្រាប់​អ្នកសារ​ព័ត៌មានថា៖ «យើងបានជួបប្រទះបញ្ហា ទាក់ទងនឹងទិដ្ឋាការអាមេរិក»។

រដ្ឋមន្ត្រីការបរទេសចិន លោក Wang Yi នឹងធ្វើជាម្ចាស់ផ្ទះនៃកិច្ចប្រជុំនាថ្ងៃអង្គារនេះ ស្រប​ពេលមានភាពតានតឹង រវាងសហរដ្ឋអាមេរិក និងអ៊ីរ៉ង់។

កិច្ចប្រជុំនេះ ដែលមានប្រធានបទ «ការរក្សាគោលបំណង និងគោលការណ៍នៃធម្មនុញ្ញអង្គការសហប្រជាជាតិ (UN) និងការពង្រឹងប្រព័ន្ធអន្តរជាតិដែលផ្តោតលើ UN» បានកើតឡើងនៅពេលដែលជម្លោះ រវាងសហរដ្ឋអាមេរិក និងអ៊ីរ៉ង់ នៅតែបន្តកើតឡើង​ក្នុង​ពេល​​កំពុង​មានបទឈប់បាញ់ដ៏ផុយស្រួយដែលសម្រប​សម្រួល​ដោយ​ប៉ាគីស្ថាន កាលពី​ថ្ងៃទី៨ ខែមេសា។

កិច្ច​ព្រម​ព្រៀង​នេះ​​ទប់ស្កាត់ការប្រយុទ្ធដែលបានចាប់ផ្តើមកាល​ពី​ថ្ងៃទី២៨ ខែកុម្ភៈ នៅពេលដែលអ៊ីស្រាអែល និងសហរដ្ឋអាមេរិក បានចាប់​ផ្តើមការវាយប្រហារយោធាប្រឆាំងនឹងទីក្រុងតេអេរ៉ង់៕