នៅក្នុងសេចក្តីថ្លែងការណ៍មួយ​ ការិយាល័យរបស់លោក Mark Carney បាន​ឲ្យ​ដឹង​ថា នាយករដ្ឋមន្ត្រីកាណាដារូប​នេះ​ កាលពីថ្ងៃចន្ទ (ទី២៥ ខែឧសភា ឆ្នាំ២០២៦) បានប្រាប់ប្រធានាធិបតីអ៊ីស្រាអែល លោក Isaac Herzog ថា ការប្រព្រឹត្តិចំពោះសកម្មជនដែលត្រូវបានឃុំខ្លួនដោយអ៊ីស្រាអែល គឺ «គួរឲ្យ​តក់ស្លុត​ណាស់​» ហើយបានពិពណ៌នាអំពីស្ថានភាព នៅតំបន់​ហ្កាហ្សាថា ជា «មហន្តរាយ»។​

សេចក្តីថ្លែងការណ៍នេះបានឲ្យដឹង​ថា៖ «លោក​នាយករដ្ឋមន្ត្រីបានបញ្ជាក់ជាថ្មីថា ការប្រព្រឹត្តិដ៏គួរឲ្យ​តក់ស្លុត ចំពោះជនស៊ីវិល ក្នុង​នោះ​រួមមាន​ទាំងពលរដ្ឋកាណាដាផង​ដែរ​ នៅលើកងនាវាដែលធ្វើដំណើរទៅកាន់​តំបន់ហ្កាហ្សា គឺមិនអាចទទួលយកបានឡើយ​ ហើយលោកបានអំពាវនាវឲ្យ​មានការស៊ើបអង្កេតឯករាជ្យ​»។

សេចក្ដី​ថ្លែង​ការណ៍បានបន្ថែម​ថា ជាមួយ​គ្នានេះ លោក Carney ក៏បានបញ្ជាក់ជាថ្មីនូវការប្រឆាំងរបស់ប្រទេសកាណាដា ចំពោះការពង្រីកការតាំងទីលំនៅដោយ​ខុសច្បាប់របស់អ៊ីស្រាអែល អំពើហិង្សារបស់អ្នកតាំងទីលំនៅ នៅតំបន់ West Bank និងអំពើហិង្សាលើ​ជនស៊ីវិលប៉ាឡេស្ទីន។

ទោះបីជាលោក Carney កាលពីសប្តាហ៍មុន បានថ្កោលទោសការប្រព្រឹត្តិ​របស់អ៊ីស្រាអែល ចំពោះសមាជិកកងនាវាក៏ដោយ ក៏​វិសាលភាពទូលំទូលាយនៃការថ្កោលទោសរបស់លោក កាល​ពី​ថ្ងៃទី២៥ ខែឧសភា បានគូសបញ្ជាក់ពីការមាន​ទំនាក់ទំនងតានតឹង រវាងអ៊ីស្រាអែល និងសម្ព័ន្ធមិត្តជិតស្និទ្ធបំផុតមួយចំនួនរបស់ខ្លួន។ ស្ថានទូតអ៊ីស្រាអែល នៅទីក្រុង Ottawa មិនអាចទាក់ទងសុំការអត្ថាធិប្បាយភ្លាមៗបាន​ឡើយ​។

គួរ​បញ្ជាក់​ថា អ្នករៀបចំកម្មវិធី បានប្រាប់​ថា សកម្មជនដែលត្រូវបានដោះលែង បន្ទាប់ពីត្រូវបានឃុំខ្លួននៅលើកងនាវាមនុស្ស​ធម៌ដែលកំពុងព្យាយាមនាំយកជំនួយទៅកាន់តំបន់ហ្កាហ្សា ត្រូវទទួលរងនូវការរំលោភបំពាន ដោយមានមនុស្សជាច្រើននាក់ត្រូវបានបញ្ជូនទៅមន្ទីរពេទ្យដោយសាររបួស និងយ៉ាងហោចណាស់ ១៥នាក់ បានរាយការណ៍ពីការរំលោភ​បំពាន​ផ្លូវភេទ ក្នុង​នោះ​រួមមាន​ទាំងការរំលោភសេពសន្ថវៈផង​ដែរ​។ សេវាកម្មពន្ធនាគាររបស់អ៊ីស្រាអែល បានបដិសេធការចោទប្រកាន់ទាំងនេះ៕