ពលរដ្ឋជម្លៀសខ្លួនលីបង់ ដែលកំពុងរស់នៅក្នុងសំពត់តង់នៅតាមមាត់សមុទ្រទីក្រុងបេរូត បាននិយាយពីពេលដែលពួកគេរត់ភៀសខ្លួនចេញពីតំបន់ជាយក្រុងភាគខាងត្បូងកាលពីយប់ថ្ងៃចន្ទម្សិលមិញ ដោយពួកគេមានការព្រួយបារម្ភពីការកើនឡើងភាពតានតឹងថ្មី ក្រោយអ៊ីស្រាអែលសន្យាបង្កើនការវាយប្រហាររបស់ពួកគេលើក្រុមហេសបូឡា ។

ពលរដ្ឋមួយចំនួននិយាយថា សំពត់តង់ និងចិញ្ចើមផ្លូវ ពេញដោយក្មេងៗជម្លៀសខ្លួន មនុស្សចាស់ និងក្រុមគ្រួសារ ។

លោកនាយករដ្ឋមន្រ្តី Benjamin Netanyahu និយាយកាលពីថ្ងៃចន្ទថា អ៊ីស្រាអែលនឹងបង្កើនការវាយប្រហារលើក្រុមហេសបូឡានៅលីបង់ ស្របពេលដែលមន្រ្តីមួយរូបរបស់សហរដ្ឋអាមេរិកនិយាយថា ក្រុមជីវពលមួយនេះ មិនអើពើនឹងការព្រមានឲ្យបញ្ឈប់ការបាញ់ប្រហារលើអ៊ីស្រាអែល នៅក្នុងជម្លោះមួយដែលអាចគំរាមកំហែងដែលកិច្ចចរចាបញ្ចប់ជម្លោះសហរដ្ឋអាមេរិក-អ៊ីរ៉ង់ ។

យោធាអ៊ីស្រាអែលនិយាយថា ពួកគេបានបើកការវាយប្រហារជាង ១០០លើកនាពេលយប់ នៅតំបន់ជ្រលងភ្នំ Beqaa Valley និងនៅទូទាំងភាគខាងត្បូងលីបង់ ដោយបានកំណត់គោលដៅកន្លែងផ្ទុកអាវុធ មជ្ឈមណ្ឌលបញ្ជា ប៉ុស្តិ៍សង្កេតការណ៍ និងហេដ្ឋារចនាសម្ព័ន្ធផ្សេងទៀតរបស់ក្រុមហេសបូឡា ។

យោងតាមទីភ្នាក់ងារសារព័ត៌មានជាតិលីបង់ បានឲ្យដឹងថា ការវាយប្រហាររបស់អ៊ីស្រាអែល បានកើនឡើងយ៉ាងខ្លាំង ដោយបានសម្លាប់មនុស្សយ៉ាងហោចណាស់ ១២នាក់ នៅជ្រលងភ្នំ Beqaa Valle ភាគខាងកើតលីបង់ និងធ្វើឲ្យមនុស្សជាច្រើននាក់ទៀត រងរបួស ។

យោធាអ៊ីស្រាអែល បានចេញការព្រមានជម្លៀសផងដែរ សម្រាប់ពលរដ្ឋរស់នៅក្នុងទីក្រុង Nabatieh ស្ថិតនៅភាគខាងត្បូងប្រទេសលីបង់ ជំរុញឲ្យពួកគេចាកចេញភ្លាមៗ មុនពេលការវាយប្រហារដែលបានគ្រោងទុក ខណៈដែលការភ័យខ្លាចពីការកើនឡើងភាពតានតឹងបន្ថែមទៀត បានកើតឡើង ៕